നോര്‍ത്താംപ്ടണിലെ സ്‌കേറ്റ് പാര്‍ക്കില്‍ വെച്ചുണ്ടായ ആക്രമണത്തില്‍ കുത്തേറ്റ് മരിച്ച 20കാരന്റെ പേരുവിവരങ്ങള്‍ പുറത്ത്. ആക്രമണത്തില്‍ ഗുരുതരമായ പരിക്കേറ്റ ഒരു കൗമാരക്കാരന്‍ അതീവ ഗുരുതരനിലയില്‍ ആശുപത്രിയില്‍ ചികിത്സയിലാണ്. നോര്‍ത്താംപ്ടണിലെ ബ്രയര്‍ ഹില്‍ സ്‌കേറ്റ് പാര്‍ക്കില്‍, ഫെബ്രുവരി 18ന് ഉച്ചകഴിഞ്ഞ മൂന്നരമണിയോടെ നടന്ന ആക്രമണത്തില്‍ മേസണ്‍ മില്ലര്‍ എന്ന 20കാരനാണ് മരണമടഞ്ഞത്.
സംഘര്‍ഷത്തിനിടെ രണ്ടുപേര്‍ക്ക് കുത്തേറ്റു എന്ന വിവരം ലഭിച്ചതിനെ തുടര്‍ന്ന് എമര്‍ജന്‍സി സര്‍വീസ് മൂന്നേമുക്കാലോടെ സംഭവസ്ഥലത്ത് എത്തിച്ചേര്‍ന്നിരുന്നു. കഠിന ശ്രമം നടത്തിയിരുന്നെങ്കിലും മില്ലര്‍ സംഭവസ്ഥലത്ത് വെച്ചു തന്നെ മരണമടയുകയായിരുന്നു. അന്വേഷണത്തില്‍ ഇതുമായി ബന്ധപ്പെട്ട് നോര്‍ത്താംപ്ടണ്‍ഷയറില്‍ നിന്നും ഏഴുപേരെ പോലീസ് അറസ്റ്റ് ചെയ്തിട്ടുണ്ട്. 14നും 17നും ഇടയില്‍ പ്രായമുള്ള നാലുപേരെ കൊലപാതക കുറ്റത്തിനാണ് അറസ്റ്റ് ചെയ്തത്. അതില്‍ ഒരാള്‍ പെണ്‍കുട്ടിയാണ്. അവര്‍ക്ക് വേണ്ട സഹായം ചെയ്തു എന്ന കുറ്റത്തിന് ഒരു 35കാരനെയും ഒരു 33കാരിയെയും അറസ്റ്റ് ചെയ്തിട്ടുണ്ട്.
