മദ്ധ്യപൂര്വ്വേഷ്യയിലെ യുദ്ധം മൂര്ച്ഛിക്കുന്നതിനിടയില് യുകെയിലെ ഡീസല് വില കഴിഞ്ഞ 16 മാസക്കാലത്തെ ഏറ്റവും ഉയര്ന്ന നിലയില് എത്തിയതായി റിപ്പോര്ട്ടുകള്. ആര് എ സിയുടെ ഫ്യുവല് വാച്ചില് നിന്നുള്ള ഏറ്റവും പുതിയ കണക്കുകള് പറയുന്നത്. ഡീസലിന്റെ വില ലിറ്ററിന് ആറു പെന്സ് വര്ദ്ധിച്ചു എന്നാണ്. ഇപ്പോള് ശരാശരി 148.35 പെന്സാണ് ഡീസലിന്റെ വില. പെട്രോള് വാഹന ഉടമകള്ക്കും വില വര്ദ്ധനവ് ബാധകമാണ്. ലിറ്ററിന് നാലു പെന്സ് വര്ദ്ധിച്ച് 136.53 പെന്സില് എത്തി നില്ക്കുകയാണ് ശരാശരി പെട്രോള് വില.
സാധാരണ 55 ലിറ്റര് കപ്പാസിറ്റിയുള്ള ഒരു ഫാമിലി കാറില് ഫുള്ടാങ്ക് ഇന്ധനമടിക്കുമ്പോള് ഡീസല് ആണെങ്കില് 3.30 പൗണ്ടും, പെട്രോള് ആണെങ്കില് രണ്ടു പൗണ്ടും ഇനി അധികമായി നല്കേണ്ടിവരും. ആഗോള എണ്ണ വിപണിയില് അസ്ഥിരത നിലനില്ക്കുന്നതിനാല്, സാഹചര്യം ഇനിയും ഗുരുതരമായേക്കും എന്നാണ് ഈ രംഗത്തുള്ളവര് പറയുന്നത്. കഴിഞ്ഞ വ്യാഴാഴ്ച്ച ബാരലിന് 85 ഡോളര് ആയിരുന്ന ബ്രെന്റ് ക്രൂഡ് ഓയിലിന്റെ വില വെള്ളിയാഴ്ച 88 ഡോളറായി ഉയര്ന്നിരുന്നു. 2024 വേനല്ക്കാലത്തിനു ശേഷം ഇത്തരത്തിലൊരു വര്ദ്ധനവ് ഉണ്ടായിട്ടില്ല.
