ഇംഗ്ലണ്ടില്‍ വാടകയ്ക്ക് താമസിക്കുന്നവരുടെ അവകാശങ്ങള്‍ മെച്ചപ്പെടുത്താന്‍ ലക്ഷ്യമിട്ടുള്ള വാടക നിയമങ്ങള്‍ മേയ് 1 മുതല്‍ നിലവില്‍ വരും. അകാരണമായി പുറത്താക്കല്‍ നിരോധിക്കുന്നതിന് പുറമെ ഫിക്‌സഡ് കോണ്‍ട്രാക്ടുകള്‍ ഒഴിവാക്കാനും, വര്‍ഷത്തില്‍ ഒരിക്കല്‍ മാത്രം വാടക വര്‍ധനയ്ക്കും നിയമം അനുശാസിക്കുന്നു.
മേയ് 31-നകം വാടകക്കാര്‍ക്ക് മാറ്റങ്ങള്‍ സംബന്ധിച്ച് ഔദ്യോഗിക രേഖ കൈമാറണമെന്നാണ് ലാന്‍ഡ്‌ലോര്‍ഡ്‌സിന് മുന്നില്‍ വെച്ചിട്ടുള്ള നിബന്ധന. ഇതിന് തയ്യാറാകാത്തവര്‍ക്ക് ഫൈനും നല്‍കും.
ഒരു മാസത്തെ വാടക മാത്രം മുന്‍കൂറായി വാങ്ങാന്‍ പാടുള്ളുവെന്ന നിബന്ധനയും നിയമത്തിന്റെ ഭാഗമാണ്. ബെനഫിറ്റുകള്‍ ലഭിക്കുന്നവര്‍ക്കും, കുട്ടികളുണ്ടെന്ന പേരിലും വിവേചനം കാണിക്കാന്‍ പാടില്ല. ഏറെ വൈകിയാണ് റെന്റല്‍ അവകാശ നിയമങ്ങള്‍ പ്രാബല്യത്തില്‍ വരുന്നത്.
ഇംഗ്ലണ്ടിലെ ലക്ഷക്കണക്കിന് വരുന്ന വാടകക്കാരെ തേടി ദിവസങ്ങള്‍ക്കുള്ളില്‍ ലാന്‍ഡ്‌ലോര്‍ഡ്‌സിന്റെ കത്ത് എത്തും. കത്ത് മേയ് 1 മുതല്‍ റെന്റേഴ്‌സ് റൈറ്റ്‌സ് ആക്ട് നിലവില്‍ വരുന്നത് സംബന്ധിച്ചുള്ള അറിയിപ്പാണ്. ഏതാനും ആഴ്ചകള്‍ക്കുള്ളില്‍ കോണ്‍ട്രാക്ടില്‍ മാറ്റം വരുമെന്ന് ടെനന്റ്‌സിനെ അറിയിക്കാനാണ് കത്ത് വരുന്നത്.
