യുകെയിലെ കുടുംബങ്ങളെ ഈ വര്‍ഷം കാത്തിരിക്കുന്നത് ഡബിള്‍ നിരക്കിലുള്ള വിലക്കയറ്റ ഭീഷണി. പണപ്പെരുപ്പം 4 ശതമാനത്തിന് മുകളിലേക്ക് വര്‍ഷത്തിന്റെ പകുതിയോടെ തന്നെ കടക്കുമെന്ന് ഇക്കണോമിസ്റ്റുകള്‍ മുന്നറിയിപ്പില്‍ പറയുന്നു.
2023 നവംബറിന് ശേഷം ആദ്യമായാകും ഈ തോതില്‍ പണപ്പെരുപ്പം ഉയരുക. സിപിഐ പണപ്പെരുപ്പം 2026-ന്റെ പകുതിയില്‍ 4 ശതമാനത്തിന് മുകളിലേക്ക് വര്‍ധിക്കുമെന്ന് പ്രതീക്ഷിക്കുന്നതായി ഓക്‌സ്‌ഫോര്‍ഡ് ഇക്കണോമിക്‌സ് സീനിയര്‍ ഇക്കണോമിസ്റ്റ് എഡ്വാര്‍ഡ് അലെന്‍ബൈ പറഞ്ഞു.
എനര്‍ജി ബില്ലുകളിലെയും, ഫ്യൂവല്‍ ചെലവുകളുടെയും ഡബിള്‍ ആഘാതമാണ് ഈ അവസ്ഥയിലേക്ക് നയിക്കുന്നത്. മിഡില്‍ ഈസ്റ്റിലെ യുദ്ധം ബ്രിട്ടന്റെ അടുക്കളകളെ ബാധിക്കുന്ന തരത്തിലേക്കാണ് നീങ്ങുന്നത്.
പെട്രോള്‍ വില കുത്തനെ ഉയരാനും, ഹോള്‍സെയില്‍ ഗ്യാസ് വില 19 ശതമാനമെങ്കിലും ഉയരാനും വഴിയുണ്ടെന്നാണ് അലെന്‍ബെയുടെ കണക്കുകൂട്ടല്‍. ജൂലൈയില്‍ ഓഫ്‌ജെം എനര്‍ജി പ്രൈസ് ക്യാപ്പ് മാറ്റം വരുത്തുമ്പോള്‍ ഈ ഷോക്ക് കൂടി അനുഭവിക്കേണ്ടി വരും.
ഹോര്‍മുസ് കടലിടുക്ക് കൂടുതല്‍ നാള്‍ അടഞ്ഞ് കിടന്നാല്‍ ആഘാതവും വര്‍ധിക്കുമെന്നാണ് മുന്നറിയിപ്പ്. ഇന്ധനവില ഉയരുന്നതോടെ സമ്പദ് വ്യവസ്ഥയിലെ മറ്റ് മേഖലകളിലേക്കും വിലക്കയറ്റം എത്തും.
