ബെംഗളൂരുവില് നിന്ന് ലണ്ടനിലേക്ക് തിരിച്ച എയര് ഇന്ത്യ വിമാനം സാങ്കേതിക തകരാര് സംശയത്തെ തുടര്ന്ന് ജിദ്ദയിലേക്ക് തിരിച്ചുവിട്ടു. മുന്കരുതല് നടപടിയായാണ് തീരുമാനം എടുത്തത്. ഇന്ത്യന് സമയം രാത്രി 7.58ന് വിമാനം ജിദ്ദ വിമാനത്താവളത്തില് സുരക്ഷിതമായി ഇറങ്ങി. യാത്രക്കാരും ജീവനക്കാരും എല്ലാവരും സുരക്ഷിതരാണെന്ന് എയര് ഇന്ത്യ അറിയിച്ചു. സാങ്കേതിക തകരാറിന്റെ സ്വഭാവം വ്യക്തമാക്കാന് വിശദമായ പരിശോധന തുടരുകയാണ്.
സംഭവത്തിന് പിന്നാലെ വിമാനം സാങ്കേതിക പരിശോധനയ്ക്ക് വിധേയമാക്കി. സുരക്ഷാ മാനദണ്ഡങ്ങള് കര്ശനമായി പാലിച്ചുകൊണ്ടാണ് പരിശോധന നടക്കുന്നത്. യാത്രക്കാരുടെ സൗകര്യങ്ങള് ഉറപ്പാക്കാന് ജിദ്ദ വിമാനത്താവള അധികൃതരുമായി ചേര്ന്ന് പ്രവര്ത്തിക്കുന്നുവെന്ന് എയര് ഇന്ത്യ അറിയിച്ചു . യാത്രക്കാര്ക്ക് താമസം, ഭക്ഷണം തുടങ്ങിയ സൗകര്യങ്ങള് ഒരുക്കിയിട്ടുണ്ട്. യാത്ര തുടരുന്നതിനുള്ള ബദല് ക്രമീകരണങ്ങളും പരിഗണനയിലാണ്.
2025 ജൂണ് 12ന് അഹമ്മദാബാദില് നിന്ന് പുറപ്പെട്ട എയര് ഇന്ത്യ വിമാനം അപകടത്തില് പെട്ടിരുന്നു. . ലണ്ടനിലേക്ക് പുറപ്പെട്ട ബോയിംഗ് 787-8 ഡ്രീംലൈര് വിമാനമാണ് പറന്നുയര്ന്നതിന് പിന്നാലെ സെക്കന്ഡുകള്ക്കകം തകര്ന്നുവീണത്. വിമാനത്തില് ഉണ്ടായിരുന്ന 241 പേര് ആണ് അപകടത്തില് മരിച്ചത്.
