നനീറ്റണില് 12 വയസുകാരിയെ പീഡിപ്പിച്ച കേസില് അഫ്ഗാന് അഭയാര്ത്ഥിയായ യുവാവിന് കോടതി ശിക്ഷ വിധിച്ചു. മുലാഖില് എന്ന പ്രതിക്കാണ് ശിക്ഷ വിധിച്ചത്. കുട്ടിയെ തട്ടിക്കൊണ്ടുപോയതിന് നാലു വര്ഷവും അശ്ലീല ദൃശ്യങ്ങള് പകര്ത്തിയതിന് രണ്ടുവര്ഷവും ശിക്ഷ നല്കിയെങ്കിലും ആകെ നാലു വര്ഷമാണ് ശിക്ഷ അനുഭവിക്കേണ്ടത്. ശേഷം പ്രതിയെ നാടുകടത്തും
സംഭവത്തിന്റെ ഗൗരവം ഉള്ക്കൊണ്ടാണ് ശിക്ഷ കര്ശനമാക്കിയതെന്ന് ജഡ്ജി വ്യക്തമാക്കി. കുട്ടിയെ തട്ടിക്കൊണ്ടുപോയി ഒറ്റപ്പെട്ട സ്ഥലത്ത് വച്ച് ഉപദ്രവിച്ചത് കുട്ടിയ്ക്ക് വലിയ മാനസിക ശാരീരിക ആഘാതമുണ്ടാക്കിയെന്ന് കോടതി കണ്ടെത്തി. ഇയാള്ക്കെതിരെ അനിശ്ചിത കാലത്തേക്ക് സെക്ഷ്വല് ഹാം പ്രിവന്ഷന് ഓര്ഡറും ഇരയായി ബന്ധം പുലര്ത്തരുതെന്ന കര്ശന നിര്ദ്ദേശവും നല്കി.
പ്രതിയുടെ പ്രായം, മുമ്പ് കുറ്റം ചെയ്തിട്ടില്ലെന്നതും കോടതി പരിഗണിച്ചു. താലിബാന് ഭീഷണിയെ തുടര്ന്ന് അഫ്ഗാനിസ്ഥാനില് നിന്ന് അഭയം തേടി യുകെയിലെത്തിയ വ്യക്തിയാണ് പ്രതി. കേസില് സഹപ്രതിയായ മുഹമ്മദ് കബീര്ക്കെതിരെ ചുമത്തിയ കുറ്റങ്ങള് കോടതി ഒഴിവാക്കി.
