യുവ നടിയുടെ ലൈംഗികാതിക്രമക്കേസില് സംവിധായകന് രഞ്ജിത്ത് റിമാന്ഡില്
കൊച്ചി: യുവ നടിയുടെ ലൈംഗികാതിക്രമ പരാതിയില് അറസ്റ്റിലായ മുന് ചലച്ചിത്ര അക്കാദമി ചെയര്മാന് സംവിധായകന് രഞ്ജിത്തിനെ റിമാന്ഡ് ചെയ്തു. വൈദ്യപരിശോധനയ്ക്കുശേഷം ആശുപത്രിവിട്ട രഞ്ജിത്തിനെ നേരെ മരടിലെ സിവില് ജഡ്ജിന്റെ വീട്ടിലെത്തിച്ചാണ് അറസ്റ്റ് നടപടികള് പൂര്ത്തിയാക്കിയത്. സംവിധായകനെ എറണാകുളം സബ് ജയിലിലേക്ക് മാറ്റും.
രാത്രിയില് വൈദ്യപരിശോധനയ്ക്ക് എത്തിച്ച രഞ്ജിത്തിന്റെ രക്തസമ്മര്ദ്ദം ഉയര്ന്നതിനെ തുടര്ന്നാണ് എറണാകുളം ജില്ലാ ജനറല് ആശുപത്രിയില് നിരീക്ഷണത്തില് പ്രവേശിപ്പിച്ചത്.
ഇന്നലെ രാത്രി എറണാകുളത്ത് നിന്നും തൊടുപുഴയിലേക്ക് പോകുന്ന വഴി മുട്ടത്തുവെച്ചാണ് എറണാകുളം സിറ്റി പൊലീസ് കമ്മീഷണറുടെ നിര്ദേശത്തെ തുടര്ന്ന് തൊടുപുഴ പൊലീസ് രഞ്ജിത്തിനെ കസ്റ്റഡിയിലെടുത്തത്. തുടര്ന്ന് കൊച്ചി പൊലീസിന് കൈമാറി. സിനിമാ ലൊക്കേഷനില് വെച്ച് പീഡിപ്പിക്കാന് ശ്രമിച്ചുവെന്ന നടിയുടെ പരാതിയിലാണ് അറസ്റ്റ്. രഞ്ജിത്തിന്റെ പുതിയ സിനിമയില് അഭിനയിക്കുന്ന നടിയാണ് പരാതിക്കാരി.
കൂടുതല് പ്രാധാന്യമുള്ള റോള് നല്കാമെന്ന് പറഞ്ഞ് കാരവാനിലേക്ക് വിളിച്ചുവരുത്തി രഞ്ജിത്ത് ലൈംഗികമായി ഉപദ്രവിച്ചുവെന്നാണ് നടി പറയുന്നത്. ഇതിനിടെ പുറത്തേയ്ക്ക് ഓടിയ നടി സഹപ്രവര്ത്തകരോട് കാര്യം പറഞ്ഞു. കോട്ടയത്തെ ഷൂട്ടിങ് ലൊക്കേഷനില്വെച്ച് രണ്ട് മാസം മുന്പാണ് സംഭവം നടന്നത്. നേരത്തെ പരാതി ഒതുക്കാന് ഉന്നതതലത്തില് ഇടപെടല് നടന്നിരുന്നു.
ആരോപണങ്ങള് നിഷേധിച്ച രഞ്ജിത്ത് പരാതിയെക്കുറിച്ച് തനിക്ക് അറിയില്ലെന്ന് മൊഴി നല്കി. എന്നാല് അന്വേഷണ സംഘം ഇത് വിശ്വാസത്തിലെടുത്തിട്ടില്ല. പരാതിക്കാസ്പദമായ സംഭവം നടന്ന സമയത്ത് സിനിമാലൊക്കേഷനില് ഉണ്ടായിരുന്നവരെ വിശദമായി ചോദ്യം ചെയ്യും. ഐസിസി അംഗങ്ങളുടെയും മൊഴിയെടുക്കും.
നടിയുടെ മൊഴി രണ്ടു ദിവസം മുമ്പാണ് വനിതാ പൊലീസ് സ്റ്റേഷനില് രഹസ്യമായി രേഖപ്പെടുത്തിയത്. തുടര്ന്നാണ് രഞ്ജിത്തിന്റെ അറസ്റ്റിലേക്ക് പൊലീസ് കടന്നത്. കേസെടുത്തതും തുടര്നടപടികളും അതീവ രഹസ്യമായാണ് നടത്തിയത്.
നേരത്തെ, രഞ്ജിത്തിനെതിരെ സമാനരീതിയില് രണ്ടു പരാതികള് ഉയര്ന്നിരുന്നു. ബംഗാളി നടിയുടെ വെളിപ്പെടുത്തലിലായിരുന്നു ഒരു പരാതി. പ്രകൃതിവിരുദ്ധ പീഡനത്തിനിരയാക്കിയെന്ന യുവാവിന്റെ പരാതിയിലും കേസെടുത്തിരുന്നു.
എറണാകുളം സിറ്റി ഡി സിപി അശ്വതി ജിജിക്കാണ് അന്വേഷണ ചുമതല
