മിഡില്‍ ഈസ്റ്റ് സംഘര്‍ഷത്തെ തുടര്‍ന്നുണ്ടായ ഊര്‍ജ്ജ, ഇന്ധന, ചെലവുകള്‍ കുത്തനെ ഉയര്‍ന്ന പശ്ചാത്തലത്തില്‍, യുകെയില്‍ ഭക്ഷ്യവില ഉയരാനും അവശ്യവസ്തുക്കളുടെ ക്ഷാമം ഉണ്ടാകാനും സാധ്യതയുണ്ടെന്ന് ആശങ്ക ഉയരുന്നു. ഈ സാഹചര്യത്തില്‍ രാജ്യത്തെ പ്രമുഖ സൂപ്പര്‍മാര്‍ക്കറ്റ് ശൃംഖലകളായ ടെസ്‌കോ ,സാനിസ്ബറി, മൊറിസണ്‍ എന്നിവയുടെ മേധാവികളുമായി ചര്‍ച്ച നടത്താന്‍ ചാന്‍സലര്‍ .റേച്ചല്‍ റീവ്‌സ് ബുധനാഴ്ച കൂടിക്കാഴ്ച നടത്തും.
വിലക്കയറ്റവും ജീവിതച്ചെലവിലെ വര്‍ധനവും സംബന്ധിച്ച ആശങ്കകള്‍ ഉയരുന്നതിനാല്‍, വിതരണ ശൃംഖലയിലെ തടസ്സങ്ങളും ഭാവിയില്‍ ഉണ്ടാകാവുന്ന ആഘാതങ്ങളും വിലയിരുത്തുകയാണ് സര്‍ക്കാരിന്റെ ലക്ഷ്യം. 'സ്ഥിതിഗതികള്‍ വിലയിരുത്താനുള്ള തുറന്ന ചര്‍ച്ചയാണ് ഇത്,' ട്രഷറി വൃത്തങ്ങള്‍ അറിയിച്ചു.
നിലവിലെ ദീര്‍ഘകാല കരാറുകളും സംഭരണങ്ങളും കാരണം ഉടന്‍ വില ഉയരില്ലെങ്കിലും, വേനല്‍ക്കാലത്തോടെ വില വര്‍ധിക്കാന്‍ സാധ്യതയുണ്ടെന്നാണ് വിലയിരുത്തല്‍. കര്‍ഷകരെ പിന്തുണയ്ക്കുകയും ഇന്ധനവില കുറയ്ക്കുകയും ചെയ്യാത്ത പക്ഷം ഭക്ഷ്യവില ഉയരുമെന്നാണ് വിദഗ്ധരുടെ മുന്നറിയിപ്പ്.
കൃഷി മേഖലയില്‍ ചെലവുകള്‍ കുത്തനെ ഉയരുന്നത് ഗുരുതര പ്രതിസന്ധിയിലേക്ക് നയിക്കുമെന്നാണ് മുന്നറിയിപ്പ്. തക്കാളി, വെള്ളരി, ക്യാപ്‌സിക്കം, വഴുതന എന്നിവ വളര്‍ത്തുന്ന ഗ്ലാസ് ഹൗസ് കര്‍ഷകര്‍ക്ക് ഊര്‍ജ്‌ച്ചെലവ് വലിയ ഭാരംയായി മാറിയിരിക്കുകയാണ്.
ചെലവുകള്‍ ഉയര്‍ന്ന സാഹചര്യത്തില്‍, വ്യാപാരസ്ഥാപനങ്ങള്‍ കര്‍ഷകരുമായി ഉള്ള കരാറുകള്‍ പുനഃപരിശോധിക്കണമെന്ന് ആവശ്യപ്പെടുന്നു. കൂടാതെ ഏപ്രില്‍ 1 മുതല്‍ വൈദ്യുതി-വാതക ബില്ലുകളില്‍ സ്ഥിരചാര്‍ജുകള്‍ ഉയരുന്നതും പ്രശ്‌നം വഷളാക്കും.അടുത്ത ഏതാനും ആഴ്ചകള്‍ക്കുള്ളില്‍ തന്നെ പല പച്ചക്കറി കര്‍ഷകരും കൃഷി അവസാനിപ്പിക്കണോ എന്ന കാര്യത്തില്‍ തീരുമാനമെടുക്കും. ഇത് വിപണിയില്‍ വിതരണക്കുറവിനും സൂപ്പര്‍മാര്‍ക്കറ്റ് ഷെല്‍ഫുകളില്‍ സാധനക്ഷാമത്തിനും വഴിവെക്കാനിടയുണ്ട്.
