ശരീരം തളര്‍ന്ന് പോകാന്‍ ഇടയാക്കുന്ന പോളിയോ വൈറസ് പടരാനുള്ള സാധ്യത നേരിട്ട് യുകെ. ഒരു തലമുറയ്ക്കിടെ കാണാത്ത തോതില്‍ ഈ പോളിയോ വൈറസ് പൊട്ടിപ്പുറപ്പെടാനുള്ള സാധ്യതകളാണ് ഉയരുന്നതെന്ന് ആരോഗ്യ വിദഗ്ധര്‍ മുന്നറിയിപ്പ് നല്‍കുന്നു.
2003-ല്‍ പോളിയോ മുക്തമായി പ്രഖ്യാപിച്ച രാജ്യമാണ് ബ്രിട്ടന്‍. 1984-ലാണ് ഒടുവിലായി കേസ് റിപ്പോര്‍ട്ട് ചെയ്തത്. എന്നാല്‍ 2022-ല്‍ നാല് ദശകങ്ങള്‍ക്ക് ശേഷം വൈറസ് കണ്ടെത്തി. ലണ്ടനിലെ സ്വീവേജ് വെള്ളത്തിലാണ് നൂറിലേറെ തവണ വൈറസിന്റെ സാന്നിധ്യം തിരിച്ചറിഞ്ഞത്.
ഇതുവരെ ഒരു വ്യക്തിക്കും കേസ് റിപ്പോര്‍ട്ട് ചെയ്തിട്ടില്ലെങ്കിലും വൈറസ് ലണ്ടനില്‍ കണ്ണില്‍ പെടാതെ കൈമാറുന്നുവെന്ന് വിദഗ്ധര്‍ വിശ്വസിക്കുന്നു. മലിന ജലത്തില്‍ വൈറസിന്റെ സാന്നിധ്യം കണ്ടെത്തിയതാണ് ഇതിന് കാരണം. ഈ റിപ്പോര്‍ട്ടുകള്‍ കാര്യമാക്കാതെ പോകുന്നത് പോളിയോ തിരിച്ചുവരാന്‍ ഇടയാക്കുമെന്ന ആശങ്കയാണുള്ളത്.
പോളിയോ മുക്ത രാജ്യമെന്നത് കൊണ്ട് തന്നെ ഈ മേഖലയില്‍ ഫണ്ട് കട്ടിംഗും, വാക്‌സിനേഷന്‍ നിരക്ക് കുറഞ്ഞ് വരികയുമാണ്. 2026-ല്‍ യുകെയില്‍ രണ്ടാം തവണയും വൈറസിനെ കണ്ടെത്തിയെന്ന് റിപ്പോര്‍ട്ടുകള്‍ വ്യക്തമാക്കുന്നു. എന്നാല്‍ രോഗം പകരുന്നുവെന്നതിന് ഇതൊന്നും തെളിവല്ലെന്നാണ് യുകെ ഹെല്‍ത്ത് സെക്യൂരിറ്റി ഏജന്‍സിയുടെ നിലപാട്.
