ഹോം സെക്രട്ടറി ഷബാന മഹമ്മൂദ് മുന്നോട്ടുവച്ച പുതിയ കുടിയേറ്റ നയപരിഷ്‌കാരങ്ങള്‍ സര്‍ക്കാര്‍ അവകാശപ്പെട്ടത്ര സാമ്പത്തിക ലാഭം നല്‍കില്ലെന്ന് പുതിയ വിവരങ്ങള്‍ വ്യക്തമാക്കുന്നു. സര്‍ക്കാര്‍ പറഞ്ഞത് പോലെ 10 ബില്യണ്‍ പൗണ്ട് ലാഭമല്ല, വെറും 600 മില്യണ്‍ പൗണ്ട് മാത്രമേ ലഭിക്കൂ എന്നതാണ് ഔദ്യോഗിക കണക്ക്.
പുതിയ പദ്ധതിപ്രകാരം, കുടിയേറ്റക്കാര്‍ക്ക് സ്ഥിരതാമസ അവകാശം ലഭിക്കാന്‍ ഇനി 5 വര്‍ഷത്തിന് പകരം 10 വര്‍ഷം കാത്തിരിക്കേണ്ടി വരും. പൊതുസേവനങ്ങളിലേക്കുള്ള ചെലവ് കുറയ്ക്കാനാണ് ഇതിലൂടെ ലക്ഷ്യമിടുന്നതെന്ന് സര്‍ക്കാര്‍ പറയുന്നു. മൈഗ്രേഷന്‍ ആഡൈ്വസറി കമ്മറ്റിയാണ് ഈ കണക്കുകള്‍ പുറത്തുവിട്ടത്.
സര്‍ക്കാര്‍ പറഞ്ഞ പത്തു ബില്യണ്‍ പൗണ്ടില്‍ വെറും 6% മാത്രമാണ് യാഥാര്‍ത്ഥ്യത്തില്‍ ലാഭം. അതായത് യഥാര്‍ത്ഥ ലാഭം ഏകദേശം 600 മില്യണ്‍ പാണ്ട് മാത്രം.
ശക്തമായ നയം മൂലം കുടിയേറ്റക്കാര്‍ നേരത്തെ രാജ്യം വിടാന്‍ സാധ്യതയുണ്ട്. ഉയര്‍ന്ന വരുമാനക്കാരായ വിദഗ്ധര്‍ യുകെയിലേക്ക് വരാന്‍ മടിക്കുമെന്നും മുന്നറിയിപ്പുണ്ട്.
കുടിയേറ്റക്കാര്‍ ആദ്യ 20 വര്‍ഷം സാമ്പത്തികമായി സംഭാവന ചെയ്യുന്നവരാണ്. ഏകദേശം 40 വര്‍ഷത്തിന് ശേഷം മാത്രമാണ് ചിലവ് വര്‍ധിക്കുന്നത് . പെന്‍ഷന്‍, ആരോഗ്യപരിചരണം എന്നിവയാണ് ഇതിന് കാരണം.
എന്നാല്‍ അടുത്ത 5 വര്‍ഷത്തിനുള്ളില്‍ ഏകദേശം 3.5 ലക്ഷം കുറഞ്ഞ കഴിവുള്ള തൊഴിലാളികളും കുടുംബാംഗങ്ങളും സ്ഥിരതാമസത്തിന് യോഗ്യത നേടും. ഈ സാഹചര്യം പൊതുസാമ്പത്തികത്തിന് 10 ബില്യണ്‍ പൗണ്ട് വരെ ഭാരം സൃഷ്ടിക്കുമെന്ന് സര്‍ക്കാര്‍ പറയുന്നു.
