യുകെയ്ക്കും ഇന്ത്യയ്ക്കും ഇടയിലുള്ള യാത്രാ മേഖലയില് വലിയ മാറ്റമാണ് ഇപ്പോള് സംഭവിക്കുന്നത്. മിഡില് ഈസ്റ്റിലെ അസ്ഥിരതകള് മൂലം ബ്രിട്ടീഷ് എയര്വേയ്സ് ഇന്ത്യയിലേക്ക് കൂടുതല് സര്വീസ് തുടങ്ങി. ഇന്ത്യയിലെയും ആഫ്രിക്കയിലെയും കൂടുതല് സ്ഥിരതയുള്ളതും ഉയര്ന്ന ഡിമാന്ഡുള്ളതുമായ വിപണികളിലേക്ക് തങ്ങളുടെ വ്യോമഗതാഗതം പുനര്വിന്യസിക്കുന്നതിനായി ബ്രിട്ടീഷ് എയര്വേയ്സ് ജിദ്ദ, ദുബായ്, ദോഹ തുടങ്ങിയ സ്ഥലങ്ങളിലേക്കുള്ള സര്വീസുകള് കുറയ്ക്കുകയാണ്. ഈ വിപുലീകരണത്തിന്റെ നല്ലൊരു ശതമാനം ഗുണവും ലഭിക്കാന് പോകുന്നത് ബെംഗളൂരുവിനാണ്. ജൂണ് മുതല് ഹീത്രൂവില് നിന്ന് ദിവസേന രണ്ടുതവണ ബ്രിട്ടീഷ് എയര്വേയ്സ് സര്വീസ് നടത്തുമെന്നാണ് സൂചന. ഇതോടൊപ്പം മുംബൈ - ഡല്ഹി ശേഷി ഉയര്ത്തുകയും ചെയ്യും. എന്നാല് മലയാളികള് വലിയ കാമ്പയിന് നടത്തിയിട്ടും കൊച്ചി പരിഗണനയിലില്ല.
2025 മാര്ച്ചില് ലണ്ടന് ഗാറ്റ്വിക്ക്-കൊച്ചി സര്വീസ് താല്ക്കാലികമായി നിര്ത്തിവയ്ക്കാനുള്ള എയര് ഇന്ത്യയുടെ വിവാദ തീരുമാനത്തെ തുടര്ന്നാണ് കേരളത്തിലെ യാത്രക്കാര്ക്കുള്ള നിലവിലെ പ്രതിസന്ധി രൂക്ഷമായത്.
കൊച്ചി-ലണ്ടന് റൂട്ടില് ഉണ്ടായിരുന്ന യാത്രാ തിരക്ക് ലാഭകരമാണെന്ന് തെളിയിച്ചിട്ടും എയര്ലൈനുകള് കേരളത്തിന്റെ ഏറ്റവും വലിയ അന്താരാഷ്ട്ര വ്യോമയാന റൂട്ടിനെ അവഗണിക്കുന്നതു തുടരുകയാണ്. ബ്രിട്ടീഷ് എയര്വേയ്സ് ഇന്ത്യന് വിപണിയില് പുതിയ അവസരങ്ങള് ഇപ്പോള് സജീവമായി തേടുന്നതിനാല്, കേരളത്തിലേക്കുള്ള നേരിട്ടുള്ള സര്വീസുകള് തുടങ്ങാനായി ക്യാമ്പയിനിംഗ് സജീവമാക്കേണ്ടിയിരിക്കുന്നു.
