ഇംഗ്ലണ്ടില് സ്ത്രീകളുടെ ആരോഗ്യസംരക്ഷണം മെച്ചപ്പെടുത്താന് പുതിയ നടപടിയുമായി സര്ക്കാര് രംഗത്ത്. ഹെല്ത്ത് സെക്രട്ടറി വെസ് സ്ട്രീറ്റിംഗ് സ്ത്രീകള്ക്ക് നേരിടേണ്ടി വരുന്ന 'അവഗണനയും അനീതിയും' അവസാനിപ്പിക്കുമെന്ന് അദ്ദേഹം വ്യക്തമാക്കി. എന്എച്ച്എസ് സ്ത്രീകളെ വിവേചനത്തോടെ കാണുന്നതായും അവരുടെ വേദനയും ലക്ഷണങ്ങളും പലപ്പോഴും ഗൗരവത്തില് കാണുന്നില്ലെന്നുമുള്ള വിമര്ശനങ്ങള്ക്ക് മറുപടി പറയുകയായിരുന്നു അദ്ദേഹം. ഇതിന്റെ ഭാഗമായി ഗര്ഭനിരോധന ഉപകരണങ്ങള് സ്ഥാപിക്കല് പോലുള്ള ചികിത്സകള്ക്കിടെ നിര്ബന്ധമായും പുതിയ മാനദണ്ഡങ്ങള് കൊണ്ടുവരും.
എന്ഡോമെട്രിയോസിസ് പോലുള്ള രോഗങ്ങള്ക്ക് രോഗനിര്ണയം നേടാന് വര്ഷങ്ങള് വൈകുന്ന പ്രശ്നം പരിഹരിക്കാനും നടപടി ഉണ്ടാകും. സ്ത്രീകളുടെ അഭിപ്രായങ്ങള് ആരോഗ്യസേവനങ്ങളുടെ ഫണ്ടിംഗുമായി ബന്ധിപ്പിക്കുന്ന പരീക്ഷണ പദ്ധതി നടപ്പാക്കും. സേവനം തൃപ്തികരമല്ലെങ്കില് പണമടയ്ക്കുന്നത് നിഷേധിക്കാന് പോലും സ്ത്രീകള്ക്ക് അധികാരം നല്കും. കൂടാതെ, ഗൈനക്കോളജി ചികിത്സയ്ക്ക് കാത്തിരിക്കുന്ന ഏകദേശം അഞ്ച് ലക്ഷം സ്ത്രീകളുടെ പ്രശ്നം പരിഹരിക്കാന് പുതിയ റഫറല് സംവിധാനം ഉള്പ്പെടെ നടപടികള് കൈക്കൊള്ളും.
സ്ത്രീകളുടെ ആരോഗ്യത്തെക്കുറിച്ചുള്ള ബോധവത്കരണത്തിനായി പ്രത്യേക വിദ്യാഭ്യാസ പദ്ധതിയും, ചികിത്സയും രോഗനിര്ണയവും വേഗത്തിലാക്കാന് ക്ലിനിക്കല് മാര്ഗ്ഗരേഖകളുടെ പുനഃസംഘടനയും പ്രഖ്യാപിച്ചിട്ടുണ്ട് ഗര്ഭനഷ്ടം ആവര്ത്തിക്കുന്ന കുടുംബങ്ങള്ക്ക് കൂടുതല് പിന്തുണ നല്കുന്നതും പരിഗണനയിലാണ്. സ്ത്രീകളുടെ ശബ്ദം കേള്ക്കപ്പെടുകയും മാന്യമായ ചികിത്സ ഉറപ്പാക്കുകയും ചെയ്യുന്നതാണ് ലക്ഷ്യമെന്ന് അധികൃതര് പറയുന്നു. ഇതിനിടെ പുതിയ പദ്ധതികളെ സ്വാഗതം ചെയ്യുമ്പോള് തന്നെ മുന്പ് ആരംഭിച്ച പദ്ധതികള് കുറയ്ക്കപ്പെടുമെന്ന ആശങ്ക വിവിധ ആരോഗ്യ സംഘടനകള് പങ്കുവെച്ചു.
