അവധിക്കാല യാത്രയ്ക്കുപോയി കന്യാകുമാരിയില് കാണാതായ കോട്ടയം സ്വദേശികളായ പ്രവാസി സഹോദരിമാരെ കടലില് മരിച്ചനിലയില് കണ്ടെത്തി. കോട്ടയം കിടങ്ങൂരിലെ ഫിലിപ്പ്-മേരി ദമ്പതിമാരുടെ മക്കളായ ആനി ഫിലിപ്പ്(35) മീര ഫിലിപ്പ്(32) എന്നിവരുടെ മൃതദേഹങ്ങളാണ് വ്യാഴാഴ്ച കടലില് കണ്ടെത്തിയത്. കാണാതായ സഹോദരിമാര്ക്കായി കന്യാകുമാരി പോലീസ് വ്യാപക തിരച്ചില് നടത്തിവരുന്നതിനിടെയാണ് ഇരുവരെയും മരിച്ചനിലയില് കണ്ടെത്തിയത്.
വിദേശത്ത് ജോലിചെയ്യുന്ന ആനി ഫിലിപ്പും മീര ഫിലിപ്പും വിനോദസഞ്ചാരത്തിനായാണ് കന്യാകുമാരിയിലെത്തിയത്. വര്ഷങ്ങളായി വിദേശത്ത് ജോലിചെയ്യുന്ന സഹോദരിമാര് അവധിക്കാലത്ത് നാട്ടിലെത്തി ഒരുമിച്ച് യാത്രപോകുന്നത് പതിവാണ്. ഇത്തവണ മധുര, രാമേശ്വരം തുടങ്ങിയ സ്ഥലങ്ങള് സന്ദര്ശിച്ചശേഷമാണ് ഇരുവരും കന്യാകുമാരിയിലെത്തിയത്. എന്നാല്, ഏപ്രില് 26 മുതല് ഇരുവരെയും കാണാതാവുകയായിരുന്നു.
കന്യാകുമാരിയിലെ ഒരു ലോഡ്ജിലാണ് ഇരുവരും താമസിച്ചിരുന്നത്. മുറിയില്നിന്ന് പുറത്തുപോയ ഇരുവരും തിരിച്ചെത്താത്തതിനാല് ലോഡ്ജ് ജീവനക്കാര് ഇവര് നല്കിയ നമ്പറില് വിളിച്ച് മാതാപിതാക്കളെ വിവരമറിയിക്കുകയായിരുന്നു. തുടര്ന്ന് ബന്ധുക്കള് കന്യാകുമാരി പോലീസില് പരാതി നല്കി.
പോലീസ് കേസെടുത്ത് തിരച്ചില് നടത്തിവരുന്നതിനിടെയാണ് മത്സ്യത്തൊഴിലാളികള് വാവുതുറ ഭാഗത്ത് കടല്ഭിത്തികള്ക്കിടയില് അടിഞ്ഞനിലയില് രണ്ടുപേരുടെയും മൃതദേഹങ്ങള് കണ്ടത്. തുടര്ന്ന് പോലീസ് സ്ഥലത്തെത്തി മൃതദേഹങ്ങള് തിരിച്ചറിച്ചറിയുകയായിരുന്നു. ഇന്ക്വസ്റ്റിന് ശേഷം മൃതദേഹങ്ങള് പോസ്റ്റ്മോര്ട്ടത്തിനായി ആശാരിപ്പള്ളം ആശുപത്രിയിലേക്ക് മാറ്റി.
ആനി ഫിലിപ്പ് വിദേശത്ത് എക്സറേ ടെക്നീഷ്യനാണ്. മീര ഫിലിപ്പ് എന്ജിനീയറും. ലണ്ടനില് താമസക്കാരിയായ എലിസബത്ത് ഫിലിപ്പ് സഹോദരിയാണ്.
