ലണ്ടനില്‍ ഞായറാഴ്ച നടക്കാനിരിക്കുന്ന വന്‍ പ്രതിഷേധ റാലികളെ മുന്നില്‍കണ്ട് വിദ്വേഷ പ്രസംഗങ്ങള്‍ക്കും അക്രമ പ്രേരണകള്‍ക്കും എതിരെ കടുത്ത നടപടിയുമായി അധികൃതര്‍. പ്രതിഷേധങ്ങളുടെ പശ്ചാത്തലത്തില്‍ ഏകദേശം 4.5 മില്യണ്‍ പൗണ്ട് ചെലവിലുള്ള വന്‍ സുരക്ഷാ ഓപ്പറേഷനാണ് മെട്രോപൊളിറ്റന്‍ പൊലീസ് തയ്യാറാക്കിയിരിക്കുന്നത്.പ്രധാനമന്ത്രി കീര്‍ സ്റ്റര്‍മര്‍ രാജ്യത്തിന്റെ 'ആത്മാവിനായുള്ള പോരാട്ടം' തന്നെയാണ് നടക്കുന്നതെന്ന് മുന്നറിയിപ്പ് നല്‍കി. വിദ്വേഷം പ്രചരിപ്പിക്കുന്നവര്‍ക്കെതിരെ ശക്തമായ നടപടിയുണ്ടാകുമെന്ന് അദ്ദേഹം വ്യക്തമാക്കി.
ലണ്ടനില്‍ ഞായറാഴ്ച ഏകദേശം 80,000 പേര്‍ വിവിധ പ്രതിഷേധങ്ങളില്‍ പങ്കെടുക്കുമെന്നാണ് കണക്കുകൂട്ടല്‍. അതേ ദിവസം തന്നെ എഫ് എ കപ്പ് ഫൈനല്‍ നടക്കുന്നതിനാല്‍ സുരക്ഷാ സജ്ജീകരണങ്ങള്‍ അതീവ ശക്തമാക്കിയിട്ടുണ്ട്.
വലതുപക്ഷ പ്രവര്‍ത്തകനായ ടോമി റോബിന്‍സണ്‍ നയിക്കുന്ന യൂണൈറ്റ് ദി കിങ്ഡം റാലിയും, പാലസ്തീന്‍ അനുകൂല സംഘടനകള്‍ സംഘടിപ്പിക്കുന്ന നക്ക്ബ ഡേ പ്രതിഷേധവും പ്രധാന വെല്ലുവിളികളായി പൊലീസ് കാണുന്നു. 1948ല്‍ ഇസ്രായേല്‍ രൂപീകരണ സമയത്ത് നടന്ന പാലസ്തീന്‍ ജനങ്ങളുടെ കുടിയൊഴിപ്പിക്കലിനെയാണ് 'നക്ക്ബ' എന്ന് വിശേഷിപ്പിക്കുന്നത്.
പ്രതിഷേധങ്ങള്‍ നിയന്ത്രിക്കാന്‍ 4,000ത്തിലധികം പൊലീസുകാരെ വിന്യസിക്കാനാണ് തീരുമാനം. ആവശ്യമെങ്കില്‍ ആര്‍മര്‍ഡ് വാഹനങ്ങളും ഉപയോഗിക്കുമെന്ന് റിപ്പോര്‍ട്ടുകള്‍ പറയുന്നു. ലണ്ടനില്‍ കഴിഞ്ഞ ഒരു ദശാബ്ദത്തിനിടെ ഇത്ര വലിയ സുരക്ഷാ നീക്കം അപൂര്‍വമാണ്.
സോഷ്യല്‍മീഡിയയിലൂടെയുള്ള വിദ്വേഷ പ്രചാരണങ്ങളും പ്രത്യേകം നിരീക്ഷിച്ചുവരികയാണ്.
