ലണ്ടനില് പൊതു ഗതാഗതത്തിന് തിരിച്ചടിയായി അണ്ടര്ഗ്രൗണ്ടില് വീണ്ടും പണിമുടക്ക് ഭീഷണി ശക്തമാകുന്നു. ആഴ്ചയില് നാല് ദിവസത്തെ ജോലി ക്രമീകരണത്തിനെതിരെ ആര്എംടി യൂണിയന് രംഗത്തെത്തിയതോടെയാണ് ചൊവ്വാഴ്ച മുതല് 24 മണിക്കൂര് നീളുന്ന സമരം ആരംഭിക്കുന്നത്. അഞ്ച് ദിവസത്തെ ജോലിയെ നാല് ദിവസത്തിലേക്ക് ചുരുക്കിയതല്ലാതെ മറ്റൊരു പ്രയോജനവും ഇല്ലെന്നാണ് യൂണിയന് മുന്നോട്ട് വെക്കുന്ന പ്രധാന വിമര്ശനം. ചൊവ്വാഴ്ച ഉച്ചയ്ക്ക് 12 നു ആരംഭിക്കുന്ന സമരം വ്യാഴാഴ്ച വീണ്ടും ആവര്ത്തിക്കുമെന്നും അറിയിച്ചിട്ടുണ്ട്.
സമരത്തെ തുടര്ന്ന് ലണ്ടനിലെ പ്രധാന ട്യൂബ് സര്വീസുകള്ക്ക് കടുത്ത തിരിച്ചടിയുണ്ടാകും. സള്ക്കിള്, പിക്കഡിലി ലൈനുകളില് പൂര്ണ സര്വീസും നിര് ത്തി വയ്ക്കും. സെന്ട്രല്, മെട്രോപൊളിറ്റന് ലൈനുകളിലും ഭാഗിക സര്വീസ് മാത്രമേ ഉണ്ടായിരിക്കൂ. യാത്രക്കാര്ക്ക് വെള്ളിയാഴ്ച വരെയും ഗതാഗത തടസം നേരിടേണ്ടി വരുമെന്നാണ് മുന്നറിയിപ്പ് നല്കിയിരിക്കുന്നത് . അതേസമയം, എല്ലാ ഡ്രൈവര്മാരും സമരത്തില് പങ്കെടുക്കില്ലെന്നും റിപ്പോര്ട്ടുണ്ട്.
അതേസമയം, അസ്ലെഫ് യൂണിയന് പുതിയ നാല് ദിവസത്തെ ജോലി ക്രമീകരണത്തെ പിന്തുണച്ചിരിക്കുകയാണ്. ചെറിയ ചില ജോലി വ്യവസ്ഥാ മാറ്റങ്ങള്ക്ക് പകരമായി വര്ഷത്തില് 35 അധിക അവധി ദിവസങ്ങള് ലഭിക്കുമെന്നാണ് യൂണിയന്റെ വിശദീകരണം. തൊഴിലാളികള്ക്ക് കൂടുതല് വിശ്രമവും വ്യക്തിജീവിതത്തിനുള്ള സമയവും ഉറപ്പാക്കുന്ന കരാറാണിതെന്ന് അസ്ലെഫ് നേതൃത്വം പ്രതികരിച്ചു.
