മന്ത്രിയായി വെറുപ്പ് സമ്പാദിക്കുന്നതിലും നല്ലത് എംഎല്‍എ ആയി തുടരുന്നത്- ചാണ്ടി ഉമ്മന്‍
മന്ത്രിയായി വെറുപ്പ് സമ്പാദിക്കുന്നതിലും നല്ലത് എംഎല്‍എ ആയി തുടരുന്നതാണെന്ന് ചാണ്ടി ഉമ്മന്‍. തന്റെ ഇടം ജനമനസിലാണ്. ഉമ്മന്‍ചാണ്ടിയോടുള്ള സ്നേഹമാണ് ജനങ്ങള്‍ തനിക്ക് നല്‍കുന്നതെന്നും അദ്ദേഹം പറഞ്ഞു. മന്ത്രിയായാല്‍ ജനങ്ങളില്‍ നിന്ന് അകലാന്‍ സാധ്യതയുണ്ട്. വികസന കാര്യങ്ങളില്‍ ചില പരിമിതികള്‍ വന്നേക്കും. എങ്കിലും ജനങ്ങളോടൊപ്പം നില്‍ക്കുന്നതാണ് പ്രധാനം. പാര്‍ട്ടിക്ക് ചില വ്യവസ്ഥകളുണ്ട്. അത് അവര്‍ പറയും. മന്ത്രി സ്ഥാനത്ത് പേര് ഉണ്ടായിരുന്നെങ്കില്‍ നേരത്തെ സൂചിപ്പിച്ചേനെയെന്നും അദ്ദേഹം പ്രതികരിച്ചു.
മന്ത്രിയാക്കുമെന്ന് മുഖ്യമന്ത്രിയോ നേതൃത്വമോ ആരും തന്നോട് പറഞ്ഞിട്ടില്ലെന്ന് ചാണ്ടി ഉമ്മന്‍ പ്രതികരിച്ചു. മന്ത്രിയായി കാണണമെന്ന ജനങ്ങളുടെ ആഗ്രഹം മാധ്യമങ്ങള്‍ കൊടുത്തതാകും. മന്ത്രിയായി കാണണമെന്ന് ആഗ്രഹിച്ചതായി ഒരുപാടു പേര് തന്നോട് നേരിട്ടും പറഞ്ഞിട്ടുണ്ട്. 2011 മുതല്‍ തനിക്ക് തെരഞ്ഞെടുപ്പുകളില്‍ മത്സരിക്കാന്‍ കഴിയുമായിരുന്നു. പക്ഷേ മത്സരിച്ചിട്ടില്ല. പ്രസ്ഥാനം തീരുമാനിക്കുമ്പോള്‍ മാത്രമേ ഏത് സ്ഥാനവും ഏറ്റെടുക്കുകയുള്ളുവെന്നും അദ്ദേഹം വ്യക്തമാക്കി.
മണ്ഡലത്തിലും ജനങ്ങള്‍ക്കും വേണ്ടി പ്രവര്‍ത്തിക്കാന്‍ ധാരാളം സമയമുണ്ട്. എ കെ ആന്റണി സുഖത്തിലും ദുഃഖത്തിലും ഒരു പോലെ ഒപ്പം ഉള്ള കുടുംബാംഗമാണ്. കാണണമെന്ന് അദ്ദേഹം ആവശ്യപ്പെട്ടതു കൊണ്ടാണ് ഇന്നലെ പോയത് എന്നും ചാണ്ടി ഉമ്മന്‍ പ്രതികരിച്ചു.
