അവശ്യ ഭക്ഷ്യവസ്തുക്കള്ക്ക് വില നിയന്ത്രിക്കാന് സൂപ്പര്മാര്ക്കറ്റുകള്ക്ക് കര്ക്കശ നിര്ദ്ദേശവുമായി സര്ക്കാര് രംഗത്ത്. പാല്, ബ്രെഡ്, മുട്ട, വെണ്ണ, അരി, ചിക്കന് തുടങ്ങിയ നിത്യോപയോഗ സാധനങ്ങളുടെ വില താല്ക്കാലികമായി 'ഫ്രീസ്' ചെയ്യുന്നതിനെ കുറിച്ചാണ് സര്ക്കാര് ചര്ച്ച നടത്തുന്നത്. മിഡില് ഈസ്റ്റ് സംഘര്ഷത്തെ തുടര്ന്ന് ഇന്ധന-ഗതാഗത ചെലവുകള് കൂടുകയും അതിന്റെ പ്രതിഫലനം ഭക്ഷ്യവിലകളില് ഉണ്ടാകുമെന്ന ആശങ്കയും ശക്തമാണ്.
എന്നാല് പ്രമുഖ സൂപ്പര്മാര്ക്കറ്റ് ശൃംഖലകള് ഈ നിര്ദേശത്തെ ശക്തമായി എതിര്ക്കുകയാണ് .ഇത് '1970-കളിലെ വിലനിയന്ത്രണ നയം'' പോലെയാണെന്നും വിപണിയില് അനാവശ്യ ഇടപെടലാണെന്നും അവര് ആരോപിച്ചു. ചെലവ് കുത്തനെ ഉയരുന്ന സാഹചര്യത്തില് നിര്ബന്ധിത വിലക്കുറവ് നടപ്പാക്കിയാല് മറ്റ് ഉല്പ്പന്നങ്ങളുടെ വില കൂടാന് സാധ്യതയുണ്ടെന്നും വ്യാപാരികള് മുന്നറിയിപ്പ് നല്കി.
അതേസമയം, സ്കോട്ടിഷ് നാഷണല് പാര്ട്ടി സ്കോട്ട്ലന്ഡില് 20 മുതല് 50 വരെ അവശ്യ ഭക്ഷ്യവസ്തുക്കള്ക്ക് നിയമപരമായ വിലപരിധി നിശ്ചയിക്കണമെന്ന ആവശ്യവും മുന്നോട്ട് വെച്ചിട്ടുണ്ട്. ജനങ്ങളുടെ പോഷകാഹാര സുരക്ഷയ്ക്ക് ഇത് അനിവാര്യമാണെന്നാണ് പാര്ട്ടിയുടെ നിലപാട്.
ചാന്സലര് റേച്ചല് റീവ്സ് ഉടന് തന്നെ ജീവിതച്ചെലവ് കുറയ്ക്കാനുള്ള പുതിയ പദ്ധതികള് പ്രഖ്യാപിക്കാനിരിക്കുകയാണ്. വിലക്കയറ്റം കൃത്രിമമായി ഉയര്ത്തുന്ന കമ്പനികള്ക്കെതിരെ നടപടിയെടുക്കാന് കൂടുതല് അധികാരം വാച്ച്ഡോഗുകള്ക്ക് നല്കാനുള്ള നടപടികളും സര്ക്കാര് ആലോചിക്കുന്നുണ്ട്.
