ന്യുഡല്‍ഹി : വിമാനത്തിന്റെ എഞ്ചിനില്‍ തീപടര്‍ന്നെന്ന സംശയത്തെ തുടര്‍ന്ന് 160-ലധികം ആളുകള്‍ ഉണ്ടായിരുന്ന എയര്‍ഇന്ത്യ വിമാനം ഡല്‍ഹിയില്‍ അടിയന്തരമായി നിലത്തിറക്കി. ബെംഗളൂരുവില്‍ നിന്ന് ഡല്‍ഹിയിലേക്ക് യാത്ര പുറപ്പെട്ട വിമാനത്തിലാണ് തീപ്പൊരി കണ്ടെത്തിയത്. പൈലറ്റുമാര്‍ക്ക് തീപിടുത്ത മുന്നറിയിപ്പ് ലഭിച്ചതിനെ തുടര്‍ന്ന് ആണ് വിമാനം അടിയന്തര ലാന്‍ഡിംഗ് നടത്തിയത്. അതിനാല്‍ വന്‍ ദുരന്തം ഒഴിവാകുകയായിരുന്നു. രാത്രി 9.30 ഓടെയാണ് വിമാനം ലാന്‍ഡ് ചെയ്തത്.
യാത്രക്കാരും ജീവനക്കാരും ഉള്‍പ്പെടെ എല്ലാവരും സുരക്ഷിതരാണെന്നും ആര്‍ക്കും പരിക്കുകളില്ലാതെ എല്ലാവരെയും വിമാനത്തില്‍ നിന്നും പുറത്തിറക്കിയതായും എയര്‍ ഇന്ത്യ പ്രസ്താവനയില്‍ അറിയിച്ചു.ബെംഗളൂരുവില്‍ നിന്ന് ഡല്‍ഹിയിലേക്ക് സര്‍വീസ് നടത്തിയ AI2802 എന്ന എ320 (A320) വിമാനമാണ് അടിയന്തരമായി ലാന്‍ഡ് ചെയ്തത്.
വിമാനം ഡല്‍ഹിയില്‍ ലാന്‍ഡ് ചെയ്യാന്‍ ഒരുങ്ങുന്നതിനിടെ കോക്ക്പിറ്റിലെ ജീവനക്കാര്‍ക്ക് ഒരു എന്‍ജിനില്‍ തീപിടിച്ചതായി സൂചന നല്‍കുന്ന ഫയര്‍ ഇന്‍ഡിക്കേഷന്‍ ലഭിക്കുകയായിരുന്നുവെന്ന് എയര്‍ ഇന്ത്യ വ്യക്തമാക്കി. എന്നാല്‍ എന്‍ജിനില്‍ യഥാര്‍ത്ഥത്തില്‍ തീപിടിത്തം ഉണ്ടായിട്ടുണ്ടോ എന്ന് ഉറപ്പിക്കാന്‍ വിശദമായ പരിശോധനകള്‍ ആവശ്യമാണെന്നും റിപ്പോര്‍ട്ടുകളുണ്ട്.
