നിയമസഭ സ്പീക്കറായി തിരുവഞ്ചൂര് രാധാകൃഷ്ണന് ചുമതലയേറ്റു
പതിനാറാം കേരള നിയമസഭയുടെ സ്പീക്കറായി തിരുവഞ്ചൂര് രാധാകൃഷ്ണനെ തിരഞ്ഞെടുത്തു. മുഖ്യമന്ത്രിയും പ്രതിപക്ഷ നേതാവും ചേര്ന്ന് പുതിയ സ്പീക്കറെ ചെയറിലേക്ക് ആനയിച്ചു. അതേസമയം ചരിത്രത്തിലാദ്യമായി സ്പീക്കര് സ്ഥാനത്തേക്ക് മൂന്ന് സ്ഥാനാര്ത്ഥികള് മത്സരിച്ചു. എല്ഡിഎഫില്നിന്ന് എസി മൊയ്തീനും, എന്ഡിഎയില്നിന്ന് ബിബി ഗോപകുമാറുമാണ് മത്സരിച്ച മറ്റ് രണ്ട് പേര്.തിരുവഞ്ചൂരിന് 101 ഉം എസി മൊയ്തീന് 35 ഉം ഗോപകുമാറിന് മൂന്നു വോട്ടും ലഭിച്ചു
പ്രോടെം സ്പീക്കര് ജി സുധാകരന്റെ നിയന്ത്രണത്തിലാണ് തിരഞ്ഞെടുപ്പ് നടന്നത്. സുധാകരന് വോട്ടു ചെയ്തില്ല. മുഖ്യമന്ത്രി വിഡി സതീശനാണ് സ്പീക്കര് തിരഞ്ഞെടുപ്പില് ആദ്യം വോട്ട് രേഖപ്പെടുത്തിയത്. 102 അംഗങ്ങളാണ് യുഡിഎഫിനുള്ളത്. 35 അംഗങ്ങളാണ് എല്ഡിഎഫിനുള്ളത്. എന്ഡിഎയ്ക്ക് മൂന്നും. അസാധു വോട്ടുകളില്ല.
രാഷ്ട്രീയത്തിലും നിയമസഭാ ജീവിതത്തിലും വിശേഷപ്പെട്ട പ്രഗല്ഭ്യം തെളിയിച്ചയാളാണ് തിരുവഞ്ചൂര് രാധാകൃഷ്ണന് എന്ന് ഫല പ്രഖ്യാപനത്തിന് പിന്നാലെ മുഖ്യമന്ത്രി വിഡി സതീശന് പറഞ്ഞു. തിരുവഞ്ചൂര് രാധാകൃഷ്ണനെ പിണറായി വിജയന് അനുമോദിച്ചു. ജൂണ് ഒന്നിനാണ് ഡെപ്യൂട്ടി സ്പീക്കര് തെരഞ്ഞെടുപ്പ്. യുഡിഎഫിന്റെ ഷാനിമോള് ഉസ്മാന് ഡെപ്യൂട്ടി സ്പീക്കറാകും. ഡെപ്യൂട്ടി സ്പീക്കര് സ്ഥാനത്തേയ്ക്ക് മത്സരിക്കുമെങ്കിലും ആരെ സ്ഥാനാര്ഥിയാക്കണമെന്ന് എല്ഡിഎഫ് തീരുമാനിച്ചിട്ടില്ല.
