യുകെയിലെ പ്രധാന റെയില്പാതകളില് യാത്ര ചെയ്യുന്നവര്ക്ക് ഇനി അതിവേഗ അതിവേഗ ഇന്റര്നെറ്റ് സൗകര്യം ലഭിക്കും . രാജ്യത്തെ 1,400-ലധികം ട്രെയിനുകളില് ലോ-എര്ത്ത് സാറ്റലൈറ്റ് സാങ്കേതികവിദ്യ ഉപയോഗിച്ചുള്ള പുതിയ ഇന്റര്നെറ്റ് സംവിധാനം നടപ്പാക്കാനാണ് സര്ക്കാരിന്റെ പദ്ധതി. നിലവില് മൊബൈല് ടവറുകളെ ആശ്രയിച്ചുള്ള 4G, 5G ശൃംഖലയാണ് ട്രെയിനുകളിലെ വൈഫൈയ്ക്ക് ഉപയോഗിക്കുന്നത്. പുതിയ സംവിധാനം വന്നാല് യാത്രയ്ക്കിടെ നേരിടുന്ന 'നെറ്റ്വര്ക്ക് ബ്ലാക്ക് സ്പോട്ടുകള്' കുറയുകയും കൂടുതല് വേഗതയും സ്ഥിരതയും ഉറപ്പാക്കുകയും ചെയ്യും.
ലണ്ടന് നോര്ത്ത് ഈസ്റ്റേണ് റെയില്വേ, സൗത്ത് വെസ്റ്റേണ് റെയില്വേ, ഗ്രേറ്റ് വെസ്റ്റേണ് റെയില്വേ തുടങ്ങിയ സര്വീസുകളില് പരീക്ഷണാടിസ്ഥാനത്തില് ഈ സാങ്കേതികവിദ്യ വിജയകരമായി പരീക്ഷിച്ചിരുന്നു. തുടര്ന്ന് 57 മില്യണ് പൗണ്ടിന്റെ സര്ക്കാര് ധനസഹായത്തോടെയാണ് പദ്ധതി വ്യാപിപ്പിക്കുന്നത്. നിലവില് 50-60 ശതമാനം മാത്രം ലഭ്യമാകുന്ന സ്ഥിരതയുള്ള വൈഫൈ സേവനം പുതിയ സംവിധാനത്തിലൂടെ 90 ശതമാനത്തിലേയ്ക്ക് ഉയര്ത്താനാകുമെന്നാണ് സര്ക്കാര് പ്രതീക്ഷിക്കുന്നത്. ഗതാഗത സെക്രട്ടറി ഹൈഡി അലക്സാണ്ടര് ഉടന് ഔദ്യോഗിക പ്രഖ്യാപനം നടത്തും.
അതേസമയം, യാത്രക്കാരുടെ പ്രധാന ആശങ്ക ഇപ്പോഴും ടിക്കറ്റ് നിരക്ക്, തിരക്ക്, സര്വീസ് വൈകല് തുടങ്ങിയവയാണെന്ന് വിവിധ സംഘടനകള് ചൂണ്ടിക്കാട്ടി . എന്നിരുന്നാലും, മികച്ച ഇന്റര്നെറ്റ് സൗകര്യം റെയില് യാത്ര കൂടുതല് ആകര്ഷകമാക്കുമെന്ന് സംഘടനകള് അഭിപ്രായപ്പെട്ടു. യാത്രയ്ക്കിടയിലും തടസ്സമില്ലാതെ ജോലി ചെയ്യാനും വിനോദ സേവനങ്ങള് ഉപയോഗിക്കാനുമാകുന്നതോടെ ബ്രിട്ടനിലെ റെയില് യാത്രയ്ക്ക് പുതിയ മുഖം ലഭിക്കുമെന്നാണ് വിലയിരുത്തല്.
