ബ്രിട്ടനിലെ ജലാശയങ്ങളില് ഇറങ്ങി ഈ സമ്മറില് ഇതിനോടകം മരണപ്പെട്ടത് 18 പേരാണ്. അതിലൊരാള് രണ്ടുപേരുടെ ജീവന്രക്ഷിച്ച ഇന്ത്യന് വംശജനായ യുവാവാണ്. 28-കാരന് റുഷഭ് പട്ടേലാണ് കുടുംബത്തോടൊപ്പം ന്യൂപോര്ട്ട് പാഗ്നെലില് എത്തിയപ്പോള് അപകടത്തില് പെട്ടത്. ദി ബീച്ചെന്ന് വിളിക്കുന്ന പിക്നിക് സ്പോട്ടില് മേയ് 24-നാണ് സംഭവം നടന്നത്.
രണ്ട് പേര് വെള്ളത്തില് മുങ്ങിയത് ശ്രദ്ധിച്ച് 28-കാരനായ പിതാവ് ഇവരെ രക്ഷിക്കാന് ഇറങ്ങുകയായിരുന്നു. ഇവരുടെ ജീവന് റുഷഭ് രക്ഷപ്പെടുത്തി. എന്നാല് ഇതിനിടെ ഇന്ത്യന് വംശജന് കാര്ഡിയാക് അറസ്റ്റ് നേരിട്ട് വെള്ളത്തില് മുങ്ങി താഴ്ന്നുവെന്നാണ് റിപ്പോര്ട്ട്.
റുഷഭിനെ എയര്ലിഫ്റ്റ് ചെയ്ത് മില്ടണ് കെയിന്സ് യൂണിവേഴ്സിറ്റി ഹോസ്പിറ്റലില് എത്തിച്ചെങ്കിലും ജീവന് രക്ഷിക്കാനായില്ല. ഏതാനും ദിവസങ്ങള്ക്ക് ശേഷം മരണം സംഭവിച്ചു.
മരണത്തിന് ശേഷം റുഷഭിന്റെ അവയവങ്ങള് മറ്റ് അഞ്ച് പേര്ക്ക് പുതുജീവന് നല്കി. പലരുടെയും ജീവിതങ്ങളിലൂടെ റുഷഭ് ഇനിയും ജീവിക്കുമെന്ന് അദ്ദേഹത്തിന്റെ സഹോദരന് അമാന് പ്രതികരിച്ചു.
രാജ്യത്ത് ചൂട് കാലാവസ്ഥ കൊടുമുടി കയറുമ്പോള് ആളുകള് ആശ്വാസം തേടി ജലാശയങ്ങളില് ഇറങ്ങുകയും, അപകടത്തില് പെടുകയും ചെയ്യുന്ന സാഹചര്യത്തില് അധികൃതര് മുന്നറിയിപ്പ് നല്കിയിട്ടുണ്ട് .
