ടി വി ലൈസന്‍സ് ഫീസ് വീണ്ടും ഉയര്‍ത്താന്‍ ബിബിസി. പണപ്പെരുപ്പം മൂലമുള്ള സാമ്പത്തിക സമ്മര്‍ദ്ദം മറികടക്കുന്നതിനായി അടുത്ത വര്‍ഷം ഫീസ് 191 പൗണ്ട് ആയി വര്‍ദ്ധിപ്പിച്ചേക്കും എന്നാണ് റിപ്പോര്‍ട്ടില്‍ പറയുന്നത്. ഈ നിര്‍ദ്ദേശം നടപ്പിലാവുകയാണെങ്കില്‍, പബ്ലിക് ബ്രോഡ്കാസ്റ്റിംഗ് ചാര്‍ജ്ജുകളുടെ കാര്യത്തില്‍ ഏറ്റവും അധികം നിരക്ക് ഈടാക്കുന്ന, യൂറോപ്പിലെ രണ്ടാമത്തെ രാജ്യമായി മാറും ബ്രിട്ടന്‍. പ്രതിവര്‍ഷം 317 പൗണ്ട് ടെലിവിഷന്‍ ഫീസ് ഈടാക്കുന്ന സ്വിറ്റ്‌സര്‍ലന്‍ഡ് ആണ് ഇക്കാര്യത്തില്‍ ഒന്നാം സ്ഥാനത്തുള്ളത്.
നിലവില്‍ ജര്‍മ്മനി ഈടാക്കുന്നത് പ്രതിവര്‍ഷം 190 പൗണ്ടാണ്. അടുത്തവര്‍ഷം ബ്രിട്ടന്‍ ടി വി ഫീസ് 191 പൗണ്ടാക്കി വര്‍ദ്ധിപ്പിക്കുകയും, ജര്‍മ്മനി ഇതേ നിരക്ക് തുടരുകയും ചെയ്താല്‍, പബ്ലിക് ബ്രോഡ്കാസ്റ്റിംഗ് ഫീസിന്റെ കാര്യത്തില്‍ ബ്രിട്ടന്‍ യൂറോപ്പില്‍ രണ്ടാം സ്ഥാനത്തെത്തും. ഇക്കഴിഞ്ഞ ഏപ്രിലില്‍ ആയിരുന്നു ടി വി ലൈസന്‍സ് ഫീസില്‍ 5.50 പൗണ്ടിന്റെ വര്‍ദ്ധനവ് വരുത്തി 180 പൗണ്ട് ആക്കിയത്. വാര്‍ത്ത പുറത്തു വന്നതോടെ ജനങ്ങള്‍ അതിനെതിരെ രൂക്ഷമായ ഭാഷയില്‍ പ്രതികരിക്കാനും ആരംഭിച്ചിട്ടുണ്ട്. ഇതോടെ ലൈസന്‍സ് വേണ്ടെന്ന് വയ്ക്കുന്നവരുടെ എണ്ണം വര്‍ദ്ധിച്ചു വരികയുമാണ്. ഇത് ബി ബി സിക്ക് മേല്‍ കനത്ത സാമ്പത്തിക സമ്മര്‍ദ്ദം ചെലുത്തുന്നുമുണ്ട്.
