കാന്സറിനോട് പോരാടി യുകെയില് മലയാളി യുവതി വിടവാങ്ങി
സ്കോട്ട് ലന്ഡിലെ ലിവിങ്സ്റ്റണില് താമസിച്ചിരുന്ന മലയാളി യുവതി ലിന്ഡ മേരി ബാബു വിടവാങ്ങി. മൂന്നുവര്ഷമായി കാന്സറിനെതിരെ ധീരമായി പോരാടിയിരുന്ന ലിന്ഡ ജൂണ് 23-നാണ് അന്തരിച്ചത്. അസുഖബാധിതയായിരുന്ന കാലത്തും അചഞ്ചലമായ ആത്മവിശ്വാസത്തോടെ ജീവിതത്തെ നേരിട്ട ലിന്ഡയുടെ വിയോഗം സ്കോട്ട് ലന്ഡിലെ മലയാളി സമൂഹത്തെ ആകെ ദുഃഖത്തിലാഴ്ത്തി.
എഡിന്ബറോയിലെ സെന്റ് അല്ഫോന്സ - സെന്റ് ആന്റണി സീറോ-മലബാര് മിഷനിലെ സജീവ അംഗമായിരുന്ന ലിന്ഡ ആത്മീയ -സാംസ്കാരിക പ്രവര്ത്തനങ്ങളിലെ നേതൃത്വപങ്ക് കൊണ്ടും സേവന മനോഭാവം കൊണ്ടും ശ്രദ്ധേയയായിരുന്നു. മരിക്കുന്നതിനു മുമ്പ് മിഷന് ഡയറക്ടര് ഫാ. സെബാസ്റ്റ്യന് തുരുത്തിപ്പിള്ളില് രോഗീലേപന കൂദാശ നല്കിയിരുന്നു. പോള് മാത്യു (ബാലു) ആണ് ഭര്ത്താവ്. മൂന്നുവയസ്സുകാരനായ ആര്ച്ചര് ആണ് ഏക മകന് .
രോഗാവസ്ഥയിലായിരുന്നിട്ടും മിഷന് പ്രവര്ത്തനങ്ങളില് സജീവമായി പങ്കെടുത്ത ലിന്ഡയുടെ സമര്പ്പണവും പോരാട്ടവീര്യവും നിരവധി പേര്ക്ക് പ്രചോദനമായിരുന്നുവെന്ന് സമൂഹാംഗങ്ങള് അനുസ്മരിച്ചു. സെന്റ് അല്ഫോന്സ പ്രയര് ഗ്രൂപ്പും സുഹൃത്തുക്കളും കുടുംബത്തിന് പിന്തുണയുമായി ഒപ്പമുണ്ട്.
സംസ്കാര ചടങ്ങുകളുടെയും അനുസ്മരണ ശുശ്രൂഷകളുടെയും വിശദാംശങ്ങള് പിന്നീട് അറിയിക്കുമെന്ന് ബന്ധുക്കള് പറഞ്ഞു.
