തിരക്കേറിയ ലണ്ടന് ബ്രോഡ്‌വെയില്‍ ആളുകള്‍ക്ക് ഇടയിലേക്ക് കാര്‍ ഇടിച്ചുകയറ്റി; അഞ്ച് പേര്‍ക്ക് പരുക്കേറ്റു; പ്രതി സൊമാലിയയില്‍ ജനിച്ച ബ്രിട്ടീഷുകാരന്‍; വധശ്രമത്തിനും, അപകടകരമായ ഡ്രൈവിംഗിനും പിടിയില്‍
ലണ്ടനില്‍ പട്ടാപ്പകല്‍ തിരക്കേറിയ റോഡിലൂടെ നടന്നുപോയ ആളുകള്‍ക്കിടയിലേക്ക് കാര്‍ ഓടിച്ചുകയറ്റിയ പ്രതി പിടിയില്‍. ആളുകള്‍ക്ക് ഇടയിലേക്ക് കാര്‍ ഇടിച്ചുകയറ്റിയ ശേഷം ഇയാള്‍ ഇവിടെ നിന്നും രക്ഷപ്പെട്ടതായി പോലീസ് പറഞ്ഞു. പിന്നീട് പ്രതിയെ അറസ്റ്റ് ചെയ്യുകയായിരുന്നു. സൊമാലിയയില്‍ ജനിച്ച ബ്രിട്ടീഷ് ഡ്രൈവറാണ് അപകടകരമായ ഡ്രൈവിംഗിനും, വധശ്രമത്തിലും കസ്റ്റഡിയിലുള്ളതെന്ന് മെട്രോപൊളിറ്റന്‍ പോലീസ് പറഞ്ഞു.
വെസ്റ്റ് ലണ്ടന് ഈലിംഗിലെ, ഈലിംഗ് ബ്രോഡ്‌വെയിലാണ് അക്രമം നടന്നത്. അഞ്ച് പേര്‍ക്ക് അപകടത്തില്‍ പരുക്കേറ്റു. ഇതില്‍ മൂന്ന് പേരെ ആശുപത്രിയിലേക്ക് മാറ്റി. ബാക്കിയുള്ളവര്‍ക്ക് സ്ഥലത്തെത്തിയ പാരാമെഡിക്കുകള്‍ സംഭവസ്ഥലത്ത് വെച്ച് ചികിത്സ നല്‍കി.
ആളുകളെ ഇടിച്ചുവീഴ്ത്തിയ കാര്‍ മറ്റുള്ളവര്‍ തടയാന്‍ ശ്രമിച്ചതോടെയാണ് അക്രമി ഇവിടെ നിന്നും വാഹനം ഓടിച്ച് രക്ഷപ്പെട്ടത്. ഒട്ടും പ്രതീക്ഷിക്കാതെയാണ് കാര്‍ വേഗത്തിലെത്തി കാല്‍നടക്കാരെ ഇടിച്ചുവീഴ്ത്തിയതെന്ന് ദൃക്‌സാക്ഷികള്‍ പറഞ്ഞു. തീവ്രവാദ വിരുദ്ധ പോലീസ് സംഭവം പരിശോധിച്ചെങ്കിലും നിലവില്‍ സംഭവത്തിന് തീവ്രവാദ ബന്ധമില്ലെന്നാണ് വിവരം.
അതേസമയം, പരുക്കേറ്റവരുടെ സ്ഥിതി ഗുരുതരമല്ലെന്ന് പോലീസ് സ്ഥിരീകരിച്ചു. സംഭവത്തിന് തീവ്രവാദ ബന്ധമില്ലെന്നാണ് നിലവില്‍ കരുതുന്നതെങ്കിലും അന്വേഷണത്തില്‍ എല്ലാ ഭാഗവും പരിശോധിക്കുമെന്ന് പോലീസ് വ്യക്തമാക്കി.
