ദിവസവും അരമണിക്കൂര് നടക്കാന് ആളുകളെ പ്രോത്സാഹിപ്പിക്കുന്നതിനായി എന്എച്ച്എസ് ഇംഗ്ലണ്ട് അടുത്ത വര്ഷം 'മാരത്തണ് എ മന്ത്' പദ്ധതി ആരംഭിക്കും. ദിവസവും അരമണിക്കൂര് വീതം നടന്നാല് ഒരു മാസത്തില് ഏകദേശം 42 കിലോമീറ്റര് . മൊബൈല് ഫോണ്, സ്മാര്ട്ട് വാച്ച് എന്നിവ ഉപയോഗിച്ച് നടത്തം രേഖപ്പെടുത്തുന്നവര്ക്ക് പദ്ധതി വിജയകരമായി പൂര്ത്തിയാക്കിയാല് വിവിധ സമ്മാനങ്ങള്, വൗച്ചറുകള്, ഡിസ്കൗണ്ടുകള് തുടങ്ങിയ ആനുകൂല്യങ്ങള്ക്ക് അര്ഹത ലഭിക്കും. ഒളിംപിക് മെഡല് ജേതാവും ഗ്രേറ്റ് നോര്ത്ത് റണ് സ്ഥാപകനുമായ സര് ബ്രെന്ഡന് ഫോസ്റ്ററുടെ നേതൃത്വത്തിലാണ് പദ്ധതി നടപ്പാക്കുന്നത്. സ്നാപ്ചാറ്റ്, ഡുവോളിംഗോ തുടങ്ങിയ ആപ്പുകളിലെ 'സ്ട്രീക്ക്' മാതൃക ഉപയോഗിച്ച് ആളുകളെ തുടര്ച്ചയായി നടക്കാന് പ്രേരിപ്പിക്കുകയാണ് ലക്ഷ്യം.
ഒരു ലക്ഷത്തിലധികം പേരെ പദ്ധതിയുടെ ഭാഗമാക്കാനാണ് എന്എച്ച്എസ് ലക്ഷ്യമിടുന്നത്. ആഴ്ചയില് അഞ്ച് ദിവസം 30 മിനിറ്റ് വീതം നടന്നാല് നാല് വര്ഷം വരെ ആരോഗ്യകരമായ ജീവിതം അധികമായി ലഭിക്കാമെന്നാണ് വിദഗ്ധര് പറയുന്നത്. ശാരീരിക നിഷ്ക്രിയത ഓരോ ആറ് മരണങ്ങളില് ഒന്നിന് കാരണമാകുന്നതായും എന്എച്ച്എസ് ചൂണ്ടിക്കാട്ടുന്നു. പദ്ധതിയുടെ പ്രാരംഭ ചെലവ് എന്എച്ച്എസ് വഹിക്കുമെങ്കിലും സമ്മാനങ്ങള്ക്കുള്ള ചെലവ് പൊതുമേഖലയിലെയും സ്വകാര്യ മേഖലയിലെയും പങ്കാളികളാണ് വഹിക്കുക. കൂടുതല് വിവരങ്ങളും റജിസ്ട്രേഷന് നടപടികളും അടുത്ത മാസങ്ങളില് പ്രഖ്യാപിക്കും.
