വേനല്ക്കാല അവധിയാത്ര കഴിഞ്ഞെത്തുന്നവര്ക്ക് യുകെയിലെ വിമാനത്താവളങ്ങളില് ആശ്വാസകരമായ മാറ്റം വരുന്നു. പുതിയ ഇളവ് പ്രകാരം എട്ടും ഒമ്പതും വയസ്സു പ്രായമുള്ള കുട്ടികള്ക്കും ഇ ഗേറ്റ് സ്കാനിങ് സംവിധാനം ഉപയോഗിക്കാം. വിമാനത്താവളത്തിലെ ഓട്ടോമാറ്റിക് പാസ്പോര്ട്ട് പരിശോധനാ സംവിധാനമായ ഇ ഗേറ്റ് ഉപയോഗിക്കാന് ഇതുവരെ മിനിമം പത്തുവയസ്സായിരുന്നു പ്രായപരിധി. ഇത് എട്ടു വയസ്സായി കുറക്കുകയാണ്. നിരവധി കുടുംബങ്ങള്ക്ക് ഇത് ആശ്വാസമാകും. പ്രതിവര്ഷം 15 ലക്ഷം കുട്ടികള്ക്ക് പുതിയ ഇളവില് ആശ്വാസം ലഭിക്കും.
അവധിക്കാല വിദേശ യാത്ര കഴിഞ്ഞു മടങ്ങുന്ന ബ്രിട്ടീഷ് കുടുംബങ്ങള്ക്ക് വിമാനത്താവളത്തിലെ കാത്തിരിപ്പ് സമയം കുറയ്ക്കുകയാണ് ലക്ഷ്യം.
രാജ്യത്തെ പ്രധാന വിമാനത്താവളങ്ങളിലായി 290 ലേറെ ഇ ഗേറ്റുകളാണ് നിലവിലുള്ളത്. ഹീത്രു, ഗാറ്റ്വിക്ക്, മാഞ്ചസ്റ്റര്, ബര്മ്മിങ്ഹാം, എഡിന്ബറോ ,സ്റ്റാന്സ്റ്റഡ് തുടങ്ങിയ വിമാനത്താവളങ്ങള്ക്ക് പുറമേ പാരിസിലേയും ബ്രസ്സല്സിലേയും യുകെ അതിര്ത്തി പരിശോധനാ കേന്ദ്രത്തിലും പുതിയ നിയമം ബാധകമാകും.
