ജര്മനിയെ നടുക്കിയ ബര്ലിന് ക്രിസ്റ്റഫര് സ്ട്രീറ്റ് ഡേ (CSD) ഭീകരാക്രമണത്തില് പരുക്കേറ്റവരില് മലയാളിയും ഉണ്ടെന്ന് വിവരം. ആക്രമണത്തിനിടെ മുഖത്തിനും കൈയ്ക്കും പരുക്കേറ്റ ഇദ്ദേഹം നിലവില് ബര്ലിനിലെ ആശുപത്രിയില് തീവ്രപരിചരണ വിഭാഗത്തില് ചികിത്സയിലാണ്.
വിദ്യാര്ഥി വീസയില് ജര്മനിയിലെത്തിയ യുവാവ് അപകടനില തരണം ചെയ്തതായാണ് വിവരം. ആക്രമണത്തില് മലയാളിക്കു പരുക്കേറ്റെന്ന വിവരം ബര്ലിനിലെ മലയാളി കൂട്ടായ്മകളാണ് പുറത്തുവിട്ടത്.
ശനിയാഴ്ച രാത്രി ആക്രമണത്തിന് ശേഷം, അക്രമി അബ്ദുള് ബല്ലൂട്ട് മാരകായുധങ്ങളുമായി ഓടി രക്ഷപ്പെടുന്നതിനിടയിലാണ് മലയാളി വിദ്യാര്ഥിക്ക് നേരെ ആക്രമണമുണ്ടായതെന്നാണ് വിവരം. ഉടന്തന്നെ സ്ഥലത്തെത്തിയ അടിയന്തര രക്ഷാസേന ഇദ്ദേഹത്തെ ആശുപത്രിയിലേക്ക് മാറ്റുകയായിരുന്നു. സംഭവം ജര്മനിയിലെ മലയാളി സമൂഹത്തെ ആശങ്കയിലാഴ്ത്തിയിട്ടുണ്ട്.
സിഎസ്ഡി ഭീകരാക്രമണത്തിന് പിന്നാലെ രാജ്യമൊട്ടാകെ അന്വേഷണസംഘം തിരഞ്ഞിരുന്ന ഐഎസ് ഭീകരന് അബ്ദുള് ബലൂട്ട് (21) പൊലീസ് വെടിവയ്പ്പില് കൊല്ലപ്പെട്ടത് ഭീതിക്ക് അയവുവന്നിട്ടുണ്ടെങ്കിലും പ്രവാസികള് ഉള്പ്പെടെയുള്ള യാത്രക്കാരും വിദ്യാര്ഥികളും വരും ദിവസങ്ങളില് ജാഗ്രത പാലിക്കണമെന്ന് ഭരണകൂടം മുന്നറിയിപ്പ് നല്കി. സംഭവത്തില് 29 പേര്ക്കാണ് പരുക്കേറ്റത്.
ഭീകരാക്രമണക്കേസിലെ പ്രതി അബ്ദുള് ബല്ലൂട്ടിന്റെ മൊബൈല് ഫോണ് അന്വേഷണസംഘം കണ്ടെടുത്തു. പ്രതിയുടെ ഫോണില് നിന്ന്, ആക്രമണം നടന്ന ദിവസം ഇയാള് ഐഎസ് ആഭിമുഖ്യം പുലര്ത്തി പ്രതിജ്ഞ ചൊല്ലുന്ന വിഡിയോയും പൊലീസ് കണ്ടെത്തിയിട്ടുണ്ട്.
കേസുമായി ബന്ധപ്പെട്ട് അന്വേഷണം പുരോഗമിക്കുകയാണെന്നും ആക്രമണത്തിന് പിന്നില് മറ്റ് ആരുടെയെങ്കിലും സഹായം ലഭിച്ചിട്ടുണ്ടോ എന്ന് പരിശോധിച്ചു വരികയാണെന്നും സുരക്ഷാ ഏജന്സികള് അറിയിച്ചു.
