അടുത്ത മാസത്തെ ബജറ്റ് വെല്ലുവിളി നിറഞ്ഞതാകുമെന്ന് സമ്മതിച്ച് ആന്ഡി ബേണ്ഹാം. ഇറാന് യുദ്ധമാണ് ബുദ്ധിമുട്ടേറിയ തീരുമാനങ്ങളിലേക്ക് നയിക്കുന്നതെന്ന് പ്രധാനമന്ത്രി കുറ്റപ്പെടുത്തി. പണപ്പെരുപ്പം 3.1 ശതമാനം വര്ധിച്ചതിന് പിന്നാലെയാണ് പ്രധാനമന്ത്രി കാര്യങ്ങള് തുറന്നുസമ്മതിച്ചത്. ഉയര്ന്ന ഇന്ധന വിലയും, എനര്ജി ബില്ലുകളുമാണ് പണപ്പെരുപ്പത്തിന് തീയിട്ടത്.
'കാര്യങ്ങള് വെല്ലുവിളിയാകും. ലോകത്തിന്റെ ചിത്രം തന്നെ വെല്ലുവിളി നിഞ്ഞതാണ്, പ്രത്യേകിച്ച് മിഡില് ഈസ്റ്റിലെ പ്രശ്നങ്ങള്. ആളുകളുടെ ജീവിതനിലവാരവും, സമ്പദ് വ്യവസ്ഥയും അപകടത്തിലാക്കാന് ഉദ്ദേശിക്കുന്നില്ല', ബേണ്ഹാം പറഞ്ഞു.
ഉയരുന്ന കടമെടുപ്പ് ചെലവുകള് നിയന്ത്രിക്കാന് ചാന്സലര് ജോണ് ഹീലി കനത്ത സമ്മര്ദം നേരിടുകയാണ്. നികുതി വര്ധിപ്പിക്കുകയോ, ചെലവ് കുറയ്ക്കുകയോ ചെയ്യുന്നതാണ് ഗവണ്മെന്റിന് മുന്നിലുള്ള പോംവഴികള്. ചെലവ് കുറയ്ക്കാന് ഗവണ്മെന്റിന് തീരെ സാധിക്കാത്ത അവസ്ഥയാണെന്ന് മുന് ബാങ്ക് ഓഫ് ഇംഗ്ലണ്ട് ഇക്കണോമിസ്റ്റ് ആന്ഡി ഹാള്ഡേന് വിമര്ശിച്ചിരുന്നു.
എന്നാല് കുടുംബങ്ങളുടെയും, സ്ഥാപനങ്ങളുടെയും ബജറ്റ് ഗവണ്മെന്റ് വീണ്ടും ഞെരുക്കരുതെന്ന് ടോറികള് ആവശ്യപ്പെട്ടു. ജനങ്ങള്ക്ക് നേരിട്ട് നികുതി ചുമത്തില്ലെന്ന ഗവണ്മെന്റ് വാഗ്ദാനത്തെ ഇപ്പോള് പഴയത് പോലെ വിശ്വാസത്തിലെടുക്കുന്നില്ല. മുന് ചാന്സലര് എംപ്ലോയര് നാഷണല് ഇന്ഷുറന്സ് വര്ധിപ്പിച്ചപ്പോള് ഫലത്തില് ഇത് ജോലിക്കാര്ക്കാണ് തിരിച്ചടിയായി മാറിയത്. എന്നാല് നികുതി വര്ധിപ്പിച്ച് ജനങ്ങളെ വീണ്ടും ബുദ്ധിമുട്ടിക്കരുതെന്ന് ടോറികള് മുന്നറിയിപ്പ് നല്കി.
