ഇമിഗ്രേഷന് നിയന്ത്രണങ്ങളുമായി മുന്നോട്ട് പോകാനുള്ള ഗവണ്മെന്റ് നീക്കത്തിന് എതിരെ ലേബര് വാര്ഷിക കോണ്ഫറന്സ് വേദിയില് സമരം നടത്താന് ബ്രിട്ടന്റെ ഏറ്റവും വലിയ ട്രേഡ് യൂണിയനായ യുണീഷന്. പ്രധാനമന്ത്രി പദത്തിലെത്തിയ ശേഷം ആന്ഡി ബേണ്ഹാം ആദ്യത്തെ കോണ്ഫറന്സ് പരീക്ഷണത്തിന് എത്തുമ്പോഴാണ് 1.3 മില്ല്യണ് അംഗങ്ങളുള്ള യൂണിയന് പിടിമുറുക്കുന്നത്.
നെറ്റ് മൈഗ്രേഷന് കുറയ്ക്കാന് ലക്ഷ്യമിട്ട് ഇന്ഡെഫനിറ്റ് ലീവ് ടു റിമെയിനായുള്ള കുടിയേറ്റക്കാരുടെ കാത്തിരിപ്പ് പത്ത് വര്ഷമാക്കി വര്ദ്ധിപ്പിക്കാനാണ് ഗവണ്മെന്റ് ആലോചന. നിലവിലെ അഞ്ച് വര്ഷമെന്നത് പത്ത് വര്ഷമാക്കിയും, മറ്റ് ചില കേസുകളില് ഇതില് കൂടുതലും യോഗ്യതാ സമയപരിധി നിശ്ചയിക്കാനാണ് നീക്കം.
എന്നാല് ലേബറിന്റെ ഇടത് വിഭാഗം ഈ നിയന്ത്രണങ്ങള്ക്ക് എതിരാണ്. ട്രേഡ് യൂണിയനുകളും നീക്കത്തെ എതിര്ക്കുന്നു. കെയര് ജീവനക്കാര്, എന്എച്ച്എസ് ജീവനക്കാര്, കുറഞ്ഞ വരുമാനത്തിലുള്ള പബ്ലിക് സര്വ്വീസ് ജീവനക്കാര് എന്നിവരെ പ്രതിനിധീകരിക്കുന്ന യൂണിയനാണ് യുണീഷന്.
'ഫെയര് വിസാ ക്യാംപെയിനാണ്' യുണീഷന് തുടക്കമിടുന്നത്. യുകെയിലേക്ക് റിക്രൂട്ട് ചെയ്ത സമയത്ത് വിദേശ ജോലിക്കാര്ക്ക് നല്കിയ വാഗ്ദാനങ്ങള് ലേബര് മന്ത്രിമാര് തകര്ക്കുന്നതായാണ് യൂണിയന് ആരോപിക്കുന്നത്. ബേണ്ഹാം പ്രധാനമന്ത്രിയായതോടെ ഷബാന മഹ്മൂദിന്റെ നയങ്ങള് അല്പ്പം മയപ്പെടുമെന്നാണ് പ്രതീക്ഷ.
