ആകാശ ദുരന്തം തടഞ്ഞ അസാധാരണ ധീരന്‍; ഇന്ത്യന്‍ പൈലറ്റിനെ അഭിനന്ദിച്ച് ഇസ്രയേല്‍ പ്രധാനമന്ത്രി
ടെല്‍ അവീവിലേക്ക് പറന്ന ഫ്‌ലൈ ദുബായ് വിമാനത്തിലുണ്ടായ ആക്രമണ ശ്രമം ധീരമായി ചെറുത്ത് വന്‍ ദുരന്തം ഒഴിവാക്കിയ ഇന്ത്യന്‍ പൈലറ്റ് ക്യാപ്റ്റന്‍ സ്മിത് മച്ചാറിനെ വാനോളം പ്രശംസിച്ച് ഇസ്രായേല്‍ പ്രധാനമന്ത്രി ബെഞ്ചമിന്‍ നെതന്യാഹു. സ്മിത് മച്ചാറിനെ 'യഥാര്‍ത്ഥ നായകന്‍' എന്ന് വിശേഷിപ്പിച്ച നെതന്യാഹു, അദ്ദേഹത്തിന്റെ ക്രിയാത്മക ഇടപെടലാണ് ആകാശത്തുണ്ടാകുമായിരുന്ന വന്‍ ദുരന്തം ഒഴിവാക്കിയതെന്നും വ്യക്തമാക്കി.
എക്‌സ് പ്ലാറ്റ്ഫോമില്‍ പങ്കുവെച്ച കുറിപ്പിലാണ് നെതന്യാഹു പൈലറ്റിന്റെ ധീരതയെ പ്രശംസിച്ചത്. കുത്തേറ്റ ഗുരുതരാവസ്ഥയിലും അദ്ദേഹം ചെറുത്തുനില്‍ക്കുകയും കോക്പിറ്റ് തുറക്കുകയും ചെയ്തു. ഇതോടെ യാത്രക്കാരും ക്രൂ അംഗങ്ങളും അകത്തുകയറി അക്രമിയെ കീഴടക്കുകയായിരുന്നു. ഇസ്രായേല്‍ പൗരന്മാരും മറ്റ് രാജ്യക്കാരും ഉള്‍പ്പെടെ 174 യാത്രക്കാരുടെ ജീവനാണ് അദ്ദേഹം രക്ഷിച്ചതെന്ന് വ്യക്തമാക്കിയ നെതന്യാഹു, അദ്ദേഹത്തിന് വേഗത്തില്‍ സൗഖ്യം ഉണ്ടാകട്ടെയെന്ന് ആശംസിക്കുകയും ചെയ്തു.
ദുബായില്‍ നിന്ന് തെല്‍ അവീവിലേക്ക് പറന്ന വിമാനം അടിയന്തര സാഹചര്യത്തെ തുടര്‍ന്ന് സൗദി അറേബ്യയിലെ തബൂക്ക് വിമാനത്താവളത്തിലേക്ക് തിരിച്ചുവിടുകയായിരുന്നു. വിമാനത്തിലെ ഒരു പൈലറ്റ് സഹപൈലറ്റിനെ കുത്തുകയും വിമാനം തകര്‍ക്കാന്‍ ശ്രമിക്കുകയും ചെയ്തുവെന്നാണ് ഇസ്രായേലി ഉദ്യോഗസ്ഥര്‍ നല്‍കുന്ന വിവരം. എന്നാല്‍ യാത്രക്കാര്‍ ഇടപെട്ട് അക്രമിയെ കീഴടക്കുകയായിരുന്നു.
തബൂക്കിലെ ആശുപത്രിയില്‍ പ്രവേശിപ്പിച്ച സ്മിത് മച്ചാര്‍ ശസ്ത്രക്രിയയ്ക്ക് വിധേയനായെന്നും അദ്ദേഹത്തിന്റെ ആരോഗ്യനില നിലവില്‍ തൃപ്തികരമാണെന്നും അധികൃതര്‍ അറിയിച്ചു. വിമാനത്തില്‍ അടിയന്തര സാഹചര്യം ഉണ്ടായെന്നും യാത്രക്കാരും ജീവനക്കാരും സുരക്ഷിതരാണെന്നും ഫ്‌ലൈ ദുബായ് സ്ഥിരീകരിച്ചിട്ടുണ്ട്. എന്നാല്‍ പൈലറ്റുമാരുടെ വിവരങ്ങളോ മറ്റ് വിശദാംശങ്ങളോ ഔദ്യോഗികമായി പുറത്തുവിടാന്‍ കമ്പനി തയ്യാറായിട്ടില്ല. 15 വര്‍ഷത്തെ വ്യോമയാന പരിചയമുള്ള സ്മിത് മച്ചാര്‍ 2022-ലാണ് ഫ്‌ലൈ ദുബായില്‍ ചേരുന്നത്. ഇതിന് മുന്‍പ് സ്‌പൈസ് ജെറ്റിലായിരുന്നു സേവനം അനുഷ്ഠിച്ചിരുന്നത്.
