കളമശേരി കൂട്ടബലാത്സംഗം; ഭാര്യ ആരെയും തിരിച്ചറിയാന്‍ കഴിയാത്ത അവസ്ഥയിലെന്ന് ഭര്‍ത്താവ്
എറണാകുളം കളമശ്ശേരിയില്‍ കൂട്ടബലാത്സംഗത്തിനിരയായ യുവതി ഗുരുതര മാനസിക-ശാരീരിക ആഘാതത്തിലാണെന്ന് ഭര്‍ത്താവ്. ആരെയും തിരിച്ചറിയാന്‍ കഴിയാത്ത അവസ്ഥയിലാണെന്നും കടുത്ത ട്രോമയിലാണെന്നും ഭര്‍ത്താവ് പറഞ്ഞു. ഐസ്ക്രീമില്‍ മയക്കുമരുന്ന് കലര്‍ത്തി നല്‍കിയ ശേഷമാണ് പീഡിപ്പിച്ചതെന്നാണ് ഭര്‍ത്താവിന്റെ ആരോപണം. രക്ഷപ്പെടാന്‍ ശ്രമിച്ചപ്പോള്‍ പ്രതികള്‍ തടഞ്ഞെന്നും വീട്ടിലെത്തുമ്പോള്‍ എഴുന്നേറ്റ് നില്‍ക്കാന്‍ പോലും കഴിയാത്ത അവസ്ഥയിലായിരുന്നുവെന്നും അദ്ദേഹം പറഞ്ഞു.
ബിയര്‍ കുപ്പി പൊട്ടിച്ച് കൈ മുറിക്കുമെന്ന് ഭീഷണിപ്പെടുത്തിയതോടെയാണ് യുവതിക്ക് അവിടെനിന്ന് രക്ഷപ്പെടാനായതെന്നാണ് ഭര്‍ത്താവിന്റെ മൊഴി. യുവതിയുടെ മൊബൈല്‍ ഫോണ്‍ പ്രതികളുടെ കൈവശമായിരുന്നെന്നും സംഭവസ്ഥലത്തുണ്ടായിരുന്ന മറ്റൊരു യുവതിയും ചൂഷണത്തിനിരയായെന്നും അദ്ദേഹം ആരോപിച്ചു. കേസില്‍ നിലവില്‍ രണ്ട് പേരാണ് അറസ്റ്റിലായത്. ഇനി രണ്ട് പേരെ കൂടി പിടികൂടാനുണ്ടെന്നാണ് പൊലീസ് പറയുന്നത്. ഇതില്‍ ഒരാള്‍ സ്ത്രീയാണ്. പ്രതികളെക്കുറിച്ച് സൂചന ലഭിച്ചിട്ടുണ്ടെങ്കിലും ഇവരുടെ മൊബൈല്‍ ഫോണുകള്‍ സ്വിച്ച്ഡ് ഓഫായതിനാല്‍ അന്വേഷണം തുടരുകയാണ്.
സ്പായിലെ മാനേജര്‍ തസ്തികയിലേക്കുള്ള ഒഎല്‍എക്സ് പരസ്യം കണ്ടാണ് യുവതി പ്രതികളെ സമീപിച്ചതെന്നാണ് പൊലീസ് കണ്ടെത്തല്‍. അഭിമുഖത്തിന് ശേഷം ജോലിക്ക് തിരഞ്ഞെടുക്കപ്പെട്ടെന്ന് പറഞ്ഞ് വീണ്ടും വിളിച്ചുവരുത്തിയ ശേഷമാണ് പീഡനം നടന്നതെന്നാണ് പരാതി. പ്രതികള്‍ക്ക് സെക്സ് റാക്കറ്റുമായി ബന്ധമുണ്ടോയെന്നും പൊലീസ് അന്വേഷിക്കുന്നുണ്ട്. പ്രതികളില്‍ ഒരാള്‍ക്ക് നാല് സ്പാകള്‍ ഉള്ളതായി സൂചന ലഭിച്ചതായും ഇവരുടെ ക്രിമിനല്‍ പശ്ചാത്തലം പരിശോധിച്ചുവരികയാണെന്നും പൊലീസ് അറിയിച്ചു.
