എല്‍ നിനോ ഇത്തവണ ബ്രിട്ടനിലേക്ക് വളരെ നേരത്തേ ശൈത്യകാലം കൊണ്ടുവന്നേക്കാമെന്ന് ബി ബി സി വെതറിലെ വിദഗ്ധര്‍. ആര്‍ക്ടിക് മേഖലയില്‍ നിന്നുള്ള ശീതവായു പ്രവാഹമാണ് ഇതിനു കാരണമാകുന്നത്. ഈ വര്‍ഷം അവസാനിക്കുന്നതിന് മുന്‍പ് തന്നെ അതിതീവ്രമായ ശൈത്യകാല കാലാവസ്ഥ എത്തുവാന്‍ ഇടയുണ്ടെന്നും അവര്‍ പറയുന്നു. ഉത്തരധ്രുവത്തിന് മുകളിലായി അന്തരീക്ഷത്തിലെ സ്ട്രാറ്റോസ്ഫിയറില്‍ അതിശക്തമായി ചുറ്റിക്കറങ്ങുന്ന, ശീതവായു പ്രവാഹമായ പോളാര്‍ വോര്‍ട്ടെക്‌സ് ദുര്‍ബലമാവുകയും സ്ട്രാറ്റോസ്ഫിയറിലെ അന്തരീക്ഷ താപനില പെട്ടെന്ന് വര്‍ദ്ധിക്കുകയും ചെയ്യുവാന്‍ എല്‍ നിനോ പ്രതിഭാസം കാരണമാകും.
2018 ല്‍ ബീസ്റ്റ് ഫ്രം ദി ഈസ്റ്റിന് കാരണമായ കോള്‍ഡ് സ്‌നാപ്‌സുമായി ഈ പ്രതിഭാസം ബന്ധപ്പെട്ടിരിക്കുന്നു. ഈ മാസം മദ്ധ്യത്തോടെ സ്‌കോട്ട്‌ലാന്‍ഡിന്റെ ചില പ്രദേശങ്ങളില്‍ മഞ്ഞുവീഴ്ച്ചയ്ക്ക് സാധ്യതയുണ്ടെന്നാണ് വെതര്‍ മോഡലുകള്‍ കാണിക്കുന്നത്. പ്രത്യേകിച്ചും ഉയര്‍ന്ന പ്രദേശങ്ങളില്‍ അഞ്ചു സെ. മീ കനത്തില്‍ വരെ മഞ്ഞുവീഴ്ച്ചയുണ്ടാകും. ഒക്ടോബറിലെ മഞ്ഞുവീഴ്ച്ച അസാധാരണമല്ലെങ്കിലും, ഈ സീസണിലെ ആദ്യ മഞ്ഞുവീഴ്ച്ചയായിരിക്കും ഇത്. ഒക്ടോബര്‍ 19 മുതല്‍ നവംബര്‍ ഒന്നു വരെയുള്ള കാലയളവില്‍ രാജ്യത്തിന്റെ തെക്കന്‍ പ്രദേശങ്ങളില്‍ പൊതുവെ വരണ്ട കാലാവസ്ഥയായിരിക്കുമെങ്കിലും വടക്കന്‍ പ്രദേശങ്ങളില്‍ ഇടയ്ക്കിടെ മഴയ്ക്ക് സാധ്യതയുണ്ടെന്നാണ് ബി ബി സി വെതറിന്റെ പ്രവചനത്തില്‍ പറയുന്നത്.
