വയലിനിസ്റ്റ് ബാലഭാസ്‌കറിന്റെ മരണത്തില്‍ തുടരന്വേഷണം നടത്താന്‍ സിബിഐക്ക് നിര്‍ദേശം നല്‍കി കോടതി. നേരത്തേ രണ്ടുതവണ അന്വേഷണം നടത്തി റിപ്പോര്‍ട്ട് സമര്‍പ്പിച്ചിരുന്നെങ്കിലും, സിബിഐയുടെ കണ്ടെത്തലുകളെ ചോദ്യം ചെയ്ത് കുടുംബം നല്‍കിയ ഹര്‍ജിയിലാണ് വീണ്ടും അന്വേഷണത്തിന് ഉത്തരവിട്ടത്. ഡിവൈഎസ്പി റാങ്കിലുള്ള ഉദ്യോഗസ്ഥര്‍ അന്വേഷണത്തിന് നേതൃത്വം നല്‍കണമെന്നും കോടതി നിര്‍ദേശിച്ചു.
ബാലഭാസ്‌കറിന്റെ മരണവുമായി ബന്ധപ്പെട്ട് മാതാപിതാക്കള്‍ ഉന്നയിച്ച സംശയങ്ങളും വിശദമായി പരിശോധിക്കണം. ജസ്റ്റിസ് ഗിരീഷ് അധ്യക്ഷനായ ബെഞ്ചാണ് ഇതുസംബന്ധിച്ച ഉത്തരവ് പുറപ്പെടുവിച്ചത്. അപകടത്തിന്റെ സാഹചര്യങ്ങളും മരണവുമായി ബന്ധപ്പെട്ട മറ്റ് സംശയങ്ങളും വീണ്ടും പരിശോധിക്കണമെന്നാണ് കുടുംബത്തിന്റെ ആവശ്യം.
2018-ലാണ് വാഹനാപകടത്തില്‍ ബാലഭാസ്‌കറും മകള്‍ തേജസ്വിനി ബാലയും മരിച്ചത്. അപകടം നടന്നതിനു പിന്നാലെ സംഭവത്തില്‍ ദുരൂഹതയുണ്ടെന്ന ആരോപണങ്ങള്‍ ഉയര്‍ന്നിരുന്നു. തുടര്‍ന്ന് നടത്തിയ സിബിഐ അന്വേഷണത്തില്‍ അപകടം സ്വാഭാവികമാണെന്നും ഗൂഢാലോചന നടന്നതിന് തെളിവില്ലെന്നും കണ്ടെത്തി റിപ്പോര്‍ട്ട് സമര്‍പ്പിച്ചിരുന്നു.
എന്നാല്‍ സിബിഐയുടെ കണ്ടെത്തലുകളില്‍ തൃപ്തരാകാത്ത കുടുംബം വീണ്ടും കോടതിയെ സമീപിക്കുകയായിരുന്നു. അപകടം നടന്ന സ്ഥലത്തെ നിര്‍ണായക സാഹചര്യങ്ങളും സാമ്പത്തിക ഇടപാടുകളും ഉള്‍പ്പെടെയുള്ള കാര്യങ്ങളില്‍ കൂടുതല്‍ അന്വേഷണം വേണമെന്നാണ് കുടുംബം ആവശ്യപ്പെട്ടത്. ഈ സാഹചര്യത്തിലാണ് മരണവുമായി ബന്ധപ്പെട്ട സംശയങ്ങള്‍ വീണ്ടും പരിശോധിക്കാന്‍ കോടതിയുടെ നിര്‍ദേശം.
