മനസാ വാചാ അറിയാത്ത കാര്യത്തിനാണ് താന്‍ ജയിലില്‍ കിടന്നതെന്ന് നടന്‍ ദിലീപ്. കഴിഞ്ഞ പത്ത് വര്‍ഷക്കാലമായി സത്യം തുറന്നുപറയാന്‍ പറ്റാത്ത അവസ്ഥയിലായിരുന്നെന്നും ദിലീപ് വ്യക്തമാക്കി. ഖത്തറില്‍ ദിലീപ് ഫാന്‍സ് അസോസിയേഷന്‍ സംഘടിപ്പിച്ച പരിപാടിയില്‍ പങ്കെടുത്ത് സംസാരിക്കുകയായിരുന്നു ദിലീപ്.
'മനസാ വാചാ അറിയാത്ത ഒരു കാര്യത്തിന് എന്നെ പിടിച്ച് അകത്തിട്ടു. കഴിഞ്ഞ പത്ത് വര്‍ഷക്കാലം എനിക്ക് എന്റേതായ രീതിയില്‍ എന്താണെന്ന് സത്യമെന്ന് പറയാന്‍ പറ്റാത്ത രീതിയില്‍ കൈകാല്‍ കെട്ടിയിട്ട അവസ്ഥയിലിട്ടു. അത്രയും ഞാന്‍ കഷ്ടപ്പെട്ട് ഉണ്ടാക്കിയെടുത്ത നിങ്ങള്‍ തന്ന സ്‌നേഹം. എന്റെ കഥാപാത്രങ്ങളിലൂടെ ദിലീപ് എന്ന കലാകാരനെ ഉണ്ടാക്കിയത് നിങ്ങളാണ്.
ആ എനിക്ക്, ശരിക്കും പറഞ്ഞാല്‍ ദിലീപ് ഫാന്‍സ് എന്ന പേരിലുള്ള അംഗങ്ങളും എന്റെ സിനിമയിലെ കഥാപാത്രങ്ങളിലൂടെ എന്നെ സ്‌നേഹിച്ച നിങ്ങളും, എനിക്ക് വേണ്ടി പ്രാര്‍ത്ഥിച്ച ഒരുപാട് ആളുകളുണ്ട്. പ്രായഭേദമന്യേ അമ്മമാരും സഹോദരിമാരും സഹോദരന്മാരും കൊച്ചു കുഞ്ഞുങ്ങളും വരെ എനിക്കുവേണ്ടി പ്രാര്‍ത്ഥിച്ചിട്ടുണ്ടെന്ന് എനിക്കറിയാം. ആ പ്രാര്‍ത്ഥനയുടെ ഫലമാണ് ഞാനിവിടെ നില്‍ക്കുന്നത്. ആ വലിയ യുദ്ധത്തില്‍ സുനാമിയില്‍പ്പെട്ട എന്നെ പിടിച്ചുനിര്‍ത്തിയത് നിങ്ങളാണ്. അതിന് നിങ്ങള്‍ ഓരോരുത്തരോടും കൈപിടിച്ച് നന്ദി പറയുകയാണ്'-ദിലീപ് പറഞ്ഞു.
ജഗന്‍ ഷാജി കൈലാസ് സംവിധാനം ചെയ്യുന്ന 'നീക്കം' ആണ് ദിലീപിന്റെ ഏറ്റവും പുതിയ ചിത്രം.
