ബ്രിട്ടനിലെ സ്വകാര്യ കാര്‍ പാര്‍ക്കിങ്ങുകളില്‍ വാഹനമോടിക്കുന്നവര്‍ക്ക് കൂടുതല്‍ സംരക്ഷണം ഉറപ്പാക്കുന്നതിനായി പുതിയ നിയമാവലി വരുന്നു. പാര്‍ക്ക് ചെയ്യണോ എന്ന് തീരുമാനിക്കാന്‍ അഞ്ച് മിനിറ്റും പാര്‍ക്കിങ് സമയം അവസാനിച്ചശേഷം പുറത്തുകടക്കാന്‍ പത്ത് മിനിറ്റും ഡ്രൈവര്‍മാര്‍ക്ക് അനുവദിക്കും. ഈ സമയപരിധിക്കുള്ളില്‍ പിഴ ചുമത്താന്‍ പാടില്ലെന്നാണ് പുതിയ ചട്ടത്തിലെ വ്യവസ്ഥ. അന്യായമായ പാര്‍ക്കിങ് പിഴകള്‍ തടയുകയാണ് ലക്ഷ്യമെന്ന് പ്രധാനമന്ത്രി ആന്‍ഡി ബേണ്‍ഹാം വ്യക്തമാക്കി.
ജീവിതച്ചെലവ് കുറയ്ക്കുന്നതിനും ഉപഭോക്താക്കള്‍ക്ക് കൂടുതല്‍ നീതിയുക്തമായ സേവനം ഉറപ്പാക്കുന്നതിനുമുള്ള സര്‍ക്കാരിന്റെ നടപടികളുടെ ഭാഗമായാണ് പുതിയ ഔദ്യോഗിക പെരുമാറ്റച്ചട്ടം അവതരിപ്പിക്കുന്നത്. ഇംഗ്ലണ്ട്, സ്‌കോട്ട്‌ലന്‍ഡ്, വെയില്‍സ് എന്നിവിടങ്ങളിലെ വാഹനമോടിക്കുന്നവര്‍ക്ക് ഇതിന്റെ പ്രയോജനം ലഭിക്കുമെന്നാണ് പ്രതീക്ഷ.
സ്വകാര്യ പാര്‍ക്കിങ് കമ്പനികള്‍ ഓരോ വര്‍ഷവും ദശലക്ഷക്കണക്കിന് പിഴ നോട്ടീസുകളാണ് നല്‍കുന്നത്. 2025-26 കാലയളവില്‍ സ്വകാര്യ പാര്‍ക്കിങ് പിഴകളുടെ എണ്ണം റെക്കോര്‍ഡ് നിരക്കായ 1.69 കോടിയിലെത്തിയതായി റോയല്‍ ഓട്ടോമൊബൈല്‍ ക്ലബ് ചൂണ്ടിക്കാട്ടിയിരുന്നു. മുന്‍വര്‍ഷത്തെ അപേക്ഷിച്ച് 17 ശതമാനമാണ് വര്‍ധന. ചില സ്വകാര്യ പാര്‍ക്കിങ് സ്ഥാപനങ്ങളുടെ പ്രവര്‍ത്തനരീതിക്കെതിരെ വ്യാപകമായ പരാതികളും ഉയര്‍ന്നിട്ടുണ്ട്. ഇതൊക്കെ കണക്കിലെടുത്താണ് വാഹമോടിക്കുന്നവര്‍ക്കു ആശ്വാസകരമായ നീക്കം.
