പ്രശസ്ത സംഗീതസംവിധായകന്‍ അനിരുദ്ധ് രവിചന്ദറും സണ്‍റൈസേഴ്സ് ഹൈദരാബാദിന്റെ സി‌ഇ‌ഒ കാവ്യ മാരനും തമ്മിലുള്ള വിവാഹം ഗ്രീസില്‍ വച്ചായിരിക്കുമെന്നു സൂചന. റിപ്പോര്‍ട്ടുകള്‍ പ്രകാരം, നവംബര്‍ 11-ന് ഗ്രീസില്‍ വെച്ച് കുടുംബാംഗങ്ങളുടെയും അടുത്ത സുഹൃത്തുക്കളുടെയും സാന്നിധ്യത്തില്‍ സ്വകാര്യ ചടങ്ങായി വിവാഹം നടക്കുമെന്നാണ് സൂചന. നവംബര്‍ 21-ന് ചെന്നൈയിലെ പ്രമുഖ ഫൈവ് സ്റ്റാര്‍ ഹോട്ടലായ 'ഐടിസി ഗ്രാന്‍ഡ് ചോള'യില്‍ വെച്ച് ആഘോഷമായ റിസപ്ഷന്‍ നടക്കും.
പ്രധാനമന്ത്രി നരേന്ദ്ര മോദി, വിവിധ സംസ്ഥാനങ്ങളിലെ മുഖ്യമന്ത്രിമാര്‍, മറ്റ് പ്രമുഖ നേതാക്കള്‍, ബിസിനസ് ഗ്രൂപ്പ് തലവന്മാര്‍, ഇന്ത്യന്‍ സിനിമാ ലോകത്തെ പ്രമുഖ താരങ്ങള്‍ എന്നിവര്‍ചടങ്ങില്‍ പങ്കെടുക്കുമെന്നാണ് കരുതുന്നത്.
സോഷ്യല്‍ മീഡിയയില്‍ ഈ വാര്‍ത്ത വലിയ രീതിയില്‍ തരംഗമായിക്കഴിഞ്ഞു. #AnirudhKavyaMaran എന്നൊക്കെയുള്ള ഹാഷ്‌ടാഗുകളില്‍ ആരാധകര്‍ ആശംസകള്‍ നേരുന്നുണ്ട്.
24,000 കോടിയിലധികം ആസ്തിയുള്ള സണ്‍ ഗ്രൂപ്പ് സാമ്രാജ്യത്തിന്റെ അവകാശിയാണ് കാവ്യ മാരന്‍. ഇന്ത്യയിലെ ഏറ്റവും വലിയ മീഡിയ ശൃംഖലകളിലൊന്നായ 'സന്‍ ഗ്രൂപ്പിന്റെ' സ്ഥാപകനും ചെയര്‍മാനുമാണ് കാവ്യയുടെ പിതാവ് കലാനിധി മാരന്‍. ടെലിവിഷന്‍ ചാനലുകള്‍, റേഡിയോ സ്റ്റേഷനുകള്‍, പ്രിന്റ് മീഡിയ, ഒടിടി പ്ലാറ്റ്‌ഫോമുകള്‍ എന്നിവയ്ക്ക് പുറമേ ഐപിഎല്‍ ഫ്രാഞ്ചൈസിയായ സണ്‍റൈസേഴ്സ് ഹൈദരാബാദിന്റെ ഉടമ കൂടിയാണ് അദ്ദേഹം.
സംഗീത ലോകത്തെ യുവ സൂപ്പര്‍ സ്റ്റാര്‍ ആണ് അനിരുദ്ധ്. സമീപകാലത്തു തമിഴകത്തിന്റെ തരംഗമായ പാട്ടുകളൊക്കെയും അനിരുദ്ധിന്റേതായിരുന്നു. ഒടുവിലിറങ്ങിയ ജയിലര്‍ 2 ഉം ആരാധകര്‍ ഏറ്റെടുത്തു.
