അനുവാദമില്ലാതെ ശരീരത്തില്‍ സ്പര്‍ശിച്ചെന്നും അപമര്യാദയായി പെരുമാറിയെന്നും ആരോപിച്ച് നടന്‍ ബാലു വര്‍ഗീസിനെതിരെ യുവതി വക്കീല്‍ നോട്ടീസ് അയച്ചു. നീന്തല്‍ക്കുളത്തില്‍വെച്ച് ബലമായി ശരീരത്തില്‍ സ്പര്‍ശിച്ചെന്നാണ് യുവതിയുടെ ആരോപണം. സംഭവത്തില്‍ ഖേദം പ്രകടിപ്പിച്ച് മാപ്പ് പറയണമെന്നും ഇത്തരം പെരുമാറ്റം ആവര്‍ത്തിക്കില്ലെന്ന് രേഖാമൂലം ഉറപ്പുനല്‍കണമെന്നും നോട്ടീസില്‍ ആവശ്യപ്പെട്ടിട്ടുണ്ട്. സംഭവത്തെക്കുറിച്ച് ‘ദ ന്യൂസ് മിനിറ്റ്’ ആണ് റിപ്പോര്‍ട്ട് ചെയ്തത്.
സംഭവം നടന്ന ഉടന്‍തന്നെ നടനോട് എതിര്‍പ്പ് അറിയിച്ചെങ്കിലും അബദ്ധത്തില്‍ സംഭവിച്ചതാണെന്നായിരുന്നു മറുപടിയെന്ന് യുവതി പറയുന്നു. പിന്നീട് ഭര്‍ത്താവ് ബാലു വര്‍ഗീസുമായി സംസാരിച്ചപ്പോഴും സമാന വിശദീകരണമാണ് ലഭിച്ചതെന്നാണ് ആരോപണം. തന്റെ അനുഭവം മറ്റ് സ്ത്രീകളുമായി പങ്കുവെച്ചപ്പോഴാണ് സമാനമായ അനുഭവങ്ങള്‍ നേരിട്ടവരുണ്ടെന്ന് മനസ്സിലായതെന്നും ഇതോടെയാണ് നിയമനടപടിയിലേക്ക് നീങ്ങിയതെന്നും യുവതി വ്യക്തമാക്കി.
കഴിഞ്ഞ വര്‍ഷം സുഹൃത്തിന്റെ ജന്മദിനാഘോഷത്തിനിടെ ബാലു വര്‍ഗീസില്‍നിന്ന് മോശം അനുഭവമുണ്ടായെന്ന് മറ്റൊരു യുവതിയും ആരോപിച്ചിട്ടുണ്ട്. സുഹൃത്തുക്കളും സഹപ്രവര്‍ത്തകരും പങ്കെടുത്ത ചടങ്ങില്‍ വിസമ്മതം അറിയിച്ചിട്ടും നടന്‍ അപമര്യാദയായി പെരുമാറിയെന്നാണ് മറ്റൊരു യുവതിയുടെ വെളിപ്പെടുത്തല്‍. അതേസമയം, ആരോപണങ്ങളില്‍ ബാലു വര്‍ഗീസിന്റെ പ്രതികരണം ഇതുവരെ ലഭ്യമായിട്ടില്ലെന്നും റിപ്പോര്‍ട്ടില്‍ പറയുന്നു.
