ഇടക്കാലത്തെ ക്ഷീണത്തിനുശേഷം ബ്രിട്ടീഷ് രാഷ്ട്രീയം പരമ്പരാഗത ദ്വികക്ഷി രാഷ്ട്രീയത്തിലേക്ക് മടങ്ങിയെത്തുമെന്ന സൂചനകളുമായി ഏറ്റവും പുതിയ അഭിപ്രായ സര്‍വ്വേഫലം . ആന്‍ഡി ബേണ്‍ഹാമിന്റെ നേതൃത്വത്തില്‍ ലേബര്‍ പാര്‍ട്ടി തകര്‍ച്ചയില്‍ നിന്നും കരകയറി കുതിക്കുകയാണ് എന്ന സൂചന തന്നെയാണ് പുതിയ അഭിപ്രായ സര്‍വ്വേയും നല്‍കുന്നത്. ഇപ്‌സോസ് നടത്തിയ ഏറ്റവും പുതിയ സര്‍വേയില്‍, 2024 ലെ പൊതുതെരഞ്ഞെടുപ്പിന് ശേഷമുള്ള ഏറ്റവും ഉയര്‍ന്ന ജനപ്രീതിയാണ് ലേബര്‍ പാര്‍ട്ടിക്ക് ലഭിച്ചിരിക്കുന്നത്, 32 ശതമാനം. കഴിഞ്ഞ മാസത്തേക്കാള്‍ 5 പോയിന്റാണ് ഇപ്പോള്‍ പാര്‍ട്ടി കൂട്ടിയിരിക്കുന്നത്
കണ്‍സര്‍വേറ്റീവ് പാര്‍ട്ടിയേക്കാള്‍ 8 പോയിന്റുകള്‍ക്ക് മുന്നിലെത്തിയ ലേബര്‍ പാര്‍ട്ടിക്ക് വ്യക്തമായ ലീഡ് തന്നെയാണ് ലഭിച്ചിരിക്കുന്നത്. എന്നാല്‍, കണ്‍സര്‍വേറ്റീവ് പാര്‍ട്ടിക്കും അവരുടെ ജനപിന്തുണയില്‍ 3 പോയിന്റ് വര്‍ദ്ധിപ്പിച്ച് 24 ശതമാനത്തില്‍ എത്താന്‍ കഴിഞ്ഞിട്ടുണ്ട്. കഴിഞ്ഞ വര്‍ഷം ജൂണ്‍ മാസത്തിനു ശേഷം ഇതാദ്യമായാണ് അഭിപ്രായ സര്‍വ്വേയില്‍ കണ്‍സര്‍വേറ്റീവ് പാര്‍ട്ടി രണ്ടാം സ്ഥാനത്ത് എത്തുന്നത്. കഴിഞ്ഞ വര്‍ഷം മുതല്‍ വലിയ കുതിച്ചു കയറ്റം നടത്തിയ റിഫോം യു. കെ, സംഭാവനകളുമായി ബന്ധപ്പെട്ട വിവാദങ്ങളെ തുടര്‍ന്ന് ജനങ്ങളില്‍ നിന്നും അകലുകയായിരുന്നു. കഴിഞ്ഞ മാസത്തേക്കാള്‍ 3 പോയിന്റ് കുറഞ്ഞ് 20 ശതമാനം സ്‌കോര്‍ നേടാന്‍ മാത്രമെ ഇവര്‍ക്ക് കഴിഞ്ഞിട്ടുള്ളൂ.
ഗ്രീന്‍ പാര്‍ട്ടിയുടെ ജനപിന്തുണയിലും വന്‍ ഇടിവാണ് ഉണ്ടായത്. കഴിഞ്ഞ മാസത്തേക്കാള്‍ അഞ്ച്‌പോയിന്റ് കുറഞ്ഞ്, എട്ട് ശതമാനം വോട്ട് മാത്രമാണ് അവര്‍ക്ക് നേടാന്‍ ആയത്. അതേസമയം, വ്യക്തിഗത സ്‌കോര്‍ പരിഗണിച്ചാല്‍ 2024 നവംബറില്‍ പ്രതിപക്ഷ നേതാവായി തെരഞ്ഞെടുക്കപ്പെട്ടതിനു ശേഷം കെമി ബെയ്ഡ്‌നോക്ക് തന്നെ ഏറ്റവും ജനപ്രീതിയുള്ള നേതാവായി തുടരുകയാണ്.
