കുറഞ്ഞ വരുമാനമുള്ള പെന്‍ഷന്‍കാര്‍ക്ക് ആദായനികുതി ഇളവ്; പുതിയ പദ്ധതി
കുറഞ്ഞ വരുമാനമുള്ള പെന്‍ഷന്‍കാര്‍ക്ക് ആദായനികുതി ബാധ്യത ഒഴിവാക്കുന്നതിനുള്ള പുതിയ പദ്ധതി ബുധനാഴ്ചത്തെ ബജറ്റില്‍ പ്രഖ്യാപിക്കാനൊരുങ്ങി ചാന്‍സലര്‍ ജോണ്‍ ഹീലി. സംസ്ഥാന പെന്‍ഷന്‍ മാത്രം വരുമാനമായുള്ളവര്‍ക്ക് നികുതി നല്‍കേണ്ടിവരില്ലെന്ന മുന്‍ വാഗ്ദാനം നടപ്പാക്കുന്നതിന്റെ ഭാഗമായാണ് പുതിയ നികുതി ഇളവ് കൊണ്ടുവരുന്നത്.
നിലവിലെ റിപ്പോര്‍ട്ടുകള്‍ പ്രകാരം, പൂര്‍ണ സംസ്ഥാന പെന്‍ഷന്‍ ഏപ്രില്‍ മുതല്‍ 3.9 ശതമാനം വര്‍ധിച്ച് വര്‍ഷം 13,036.40 പൗണ്ടാകുമെന്നാണ് പ്രതീക്ഷിക്കുന്നത്. ഇത് നിലവിലെ 12,570 പൗണ്ടിന്റെ വ്യക്തിഗത നികുതിയിളവ് പരിധി മറികടക്കും. മാറ്റങ്ങളൊന്നും വരുത്തിയില്ലെങ്കില്‍ സംസ്ഥാന പെന്‍ഷന്‍ മാത്രം ലഭിക്കുന്നവര്‍ക്കുപോലും ആദായനികുതി ബാധ്യതയുണ്ടാകാം.
ഈ സാഹചര്യം ഒഴിവാക്കാന്‍ കുറഞ്ഞ വരുമാനമുള്ള പെന്‍ഷന്‍കാര്‍ക്കായി പ്രത്യേക നികുതിയിളവ് അനുവദിക്കാനാണ് സര്‍ക്കാരിന്റെ നീക്കം. ചെറിയ തുകയുടെ നികുതി അടയ്ക്കുന്നതിനായി പെന്‍ഷന്‍കാര്‍ക്ക് സങ്കീര്‍ണമായ നടപടിക്രമങ്ങള്‍ നേരിടേണ്ടിവരുന്നത് ഒഴിവാക്കാനും പദ്ധതി സഹായിക്കുമെന്ന് ചാന്‍സലറുടെ അടുത്ത വൃത്തങ്ങള്‍ പറയുന്നു.
പുതിയ നികുതിയിളവ് എത്ര പെന്‍ഷന്‍കാര്‍ക്ക് പ്രയോജനപ്പെടുമെന്നതുള്‍പ്പെടെയുള്ള വിശദാംശങ്ങള്‍ ട്രഷറി ഇതുവരെ പുറത്തുവിട്ടിട്ടില്ല.
