യുകെയില്‍ ഹാലോവീന്‍ ആഘോഷത്തിനിടെ നടന്ന കത്തിക്കുത്ത് ആക്രമണത്തില്‍ അഞ്ച് കൗമാരക്കാര്‍ക്ക് ഗുരുതരമായി പരിക്കേറ്റു. ഈസ്റ്റ്ലീഗിന് സമീപം ചാന്‍ഡ്ലേഴ്സ് ഫോര്‍ഡിലെ പാര്‍ക്ക് റോഡില്‍ ശനിയാഴ്ച രാത്രി 10.30ഓടെയാണ് സംഭവം.ആക്രമണത്തില്‍ 16 വയസ്സുള്ള മൂന്ന് ആണ്‍കുട്ടികള്‍ക്കും 17 വയസ്സുള്ള രണ്ട് ആണ്‍കുട്ടികള്‍ക്കുമാണ് പരിക്കേറ്റത്. ഇവരെ ഉടന്‍ ആശുപത്രിയില്‍ പ്രവേശിപ്പിച്ചു. പരിക്കേറ്റവരുടെ ആരോഗ്യനില സംബന്ധിച്ച കൂടുതല്‍ വിവരങ്ങള്‍ പൊലീസ് പുറത്തുവിട്ടിട്ടില്ല.
പാര്‍ട്ടി നടന്നിരുന്ന വീട്ടിലേക്ക് അജ്ഞാതരായ ഒരു സംഘം അതിക്രമിച്ചുകയറിയ ശേഷമാണ് കത്തിക്കുത്ത് നടന്നതെന്നാണ് ഹാംഷെയര്‍ പൊലീസ് നല്‍കുന്ന വിവരം.
സംഭവസ്ഥലത്തുനിന്ന് ഒരാള്‍ പുറത്തേക്ക് ഓടിവന്ന് തനിക്ക് കുത്തേറ്റെന്നും രണ്ടുപേര്‍ പിന്തുടരുകയാണെന്നും വിളിച്ചുപറയുന്നത് കണ്ടതായി ദൃക്‌സാക്ഷി വെളിപ്പെടുത്തി. ആംബുലന്‍സിനൊപ്പം എയര്‍ ആംബുലന്‍സും സ്ഥലത്തെത്തിയാണ് കു്‌ത്തേറ്റവരെ ആശുപത്രിയിലെത്തിച്ചത്.
പ്രദേശത്ത് പൊലീസ് നിയന്ത്രണം ഏറ്റെടുത്തു. ആക്രമണത്തിന് പിന്നിലുള്ളവരെ കണ്ടെത്താന്‍ അന്വേഷണം ഊര്‍ജിതമാക്കിയിട്ടുണ്ട്. സംഭവത്തെക്കുറിച്ച് വിവരം ലഭിക്കുന്നവര്‍ പൊലീസിനെ അറിയിക്കണമെന്നും അധികൃതര്‍ അഭ്യര്‍ഥിച്ചു.
