വിസിറ്റിംഗ് വിസയ്ക്കുള്ള കടുത്ത നിയന്ത്രണങ്ങള്‍ പിന്‍വലിച്ച് ബ്രിട്ടീഷ് സര്‍ക്കാര്‍. ഇതനുസരിച്ച് വിസിറ്റിംഗ് വിസയില്‍ എത്തുന്നവര്‍ക്ക് ഇറാസ്മസ് പ്ലസ് പ്രോഗ്രാമിനു കീഴില്‍ സമ്പൂര്‍ണ്ണ സ്റ്റുഡന്റ് വിസ ഇല്ലെങ്കില്‍ കൂടി ചില കോഴ്‌സുകള്‍ക്ക് ചേരാം. ഏതെങ്കിലും അക്രഡിറ്റഡ് ഇന്‍സ്റ്റിറ്റിയൂഷനുകളില്‍ പഠിക്കാനോ, ഹ്രസ്വകാല ട്രെയിനിഷിപ്പിന് ചേരുവാനോ, വര്‍ക്ക്‌ഷോപ്പുകളില്‍ പങ്കെടുക്കുവാനോ എല്ലാം സാധാരണ വിസിറ്റിംഗ് വിസയില്‍ എത്തുന്നവര്‍ക്ക് കഴിയും.
ആറ് മാസം വരെയുള്ള കോഴ്‌സുകള്‍ക്ക് ചേരാനാണ് വിസിറ്റിംഗ് വിസയിലെത്തുന്നവര്‍ക്ക് അര്‍ഹതയുണ്ടായിരിക്കുക. അതിനായി ഒരു പൂര്‍ണ്ണ സ്റ്റുഡന്റ് വിസ ആവശ്യമില്ല. അപേക്ഷകന്‍, ബ്രിട്ടനിലെത്തുന്നത് എന്ത് ചെയ്യാനാണ്, എത്രനാള്‍ താമസിക്കും, അപേക്ഷകന്റെ പ്രായം എന്നിവയുടെ അടിസ്ഥാനത്തില്‍ മൂന്ന് പ്രധാന ഇമിഗ്രേഷന്‍ റൂട്ടുകളാണ് വിസ ആന്‍ഡ് എന്‍ട്രി ക്ലിയറന്‍സ് ചാനല്‍ വഴി സര്‍ക്കാര്‍ ഔദ്യോഗികമായി പ്രഖ്യാപിച്ചിരിക്കുന്നത്. അതില്‍ ലഭിക്കാന്‍ ഏറ്റവും എളുപ്പമുള്ളത് സ്റ്റാന്‍ഡേര്‍ഡ് സന്ദര്‍ശക വിസ തന്നെയാണ്.
എന്നാല്‍, ആറ് മാസത്തിലധികം നീളുന്ന കോഴ്‌സുകളില്‍ ചേരാന്‍ ഒരു സമ്പൂര്‍ണ്ണ സ്റ്റുഡന്റ് വിസ തന്നെ ആവശ്യമായി വരും.
