ഇംഗ്ലണ്ടിന്റെ വിവിധ ഭാഗങ്ങളില്‍ കനത്ത മൂടല്‍മഞ്ഞ് അനുഭവപ്പെടാന്‍ സാധ്യതയുള്ളതിനാല്‍ യാത്രാതടസ്സമുണ്ടാകുമെന്ന് മുന്നറിയിപ്പ് നല്‍കി മെറ്റ് ഓഫീസ്. ഞായറാഴ്ച രാവിലെ വരെ യെല്ലോ കാലാവസ്ഥാ മുന്നറിയിപ്പ് പുറപ്പെടുവിച്ചിരുന്നു. സ്റ്റോക്ക്-ഓണ്‍-ട്രെന്റ് മുതല്‍ ഈസ്റ്റ്, വെസ്റ്റ് മിഡ്ലാന്‍ഡ്സിന്റെ വിവിധ ഭാഗങ്ങളിലൂടെയും പടിഞ്ഞാറ് എക്‌സീറ്റര്‍ മുതല്‍ കിഴക്ക് ബ്രൈറ്റണ്‍ വരെയുമാണ് മുന്നറിയിപ്പ് ബാധകമാകുന്നത്.
കനത്ത മൂടല്‍മഞ്ഞ് കാരണം ചില പ്രദേശങ്ങളില്‍ ദൂരക്കാഴ്ച 50 മീറ്ററില്‍ താഴെയാകാന്‍ സാധ്യതയുണ്ട്. ഇതോടെ റോഡ് യാത്രകള്‍ മന്ദഗതിയിലാകാനും ബസ്, ട്രെയിന്‍ സര്‍വീസുകള്‍ വൈകാനും സാധ്യതയുണ്ട്. വിമാന സര്‍വീസുകള്‍ റദ്ദാക്കുകയോ വൈകുകയോ ചെയ്യാനും ഇടയുണ്ടെന്ന് അധികൃതര്‍ മുന്നറിയിപ്പ് നല്‍കി.
കഴിഞ്ഞ കുറച്ചു ദിവസങ്ങളായി ബ്രിട്ടന് മുകളില്‍ നിലനില്‍ക്കുന്ന ഉയര്‍ന്ന മര്‍ദമേഖലയും കാറ്റിന്റെ അഭാവവുമാണ് മൂടല്‍മഞ്ഞ് ശക്തമാകാന്‍ കാരണമെന്ന് മെറ്റ് ഓഫീസ് കാലാവസ്ഥാ നിരീക്ഷകന്‍ ടോം മോര്‍ഗന്‍ പറഞ്ഞു. വാരാന്ത്യത്തിലും അടുത്ത ആഴ്ചയുടെ തുടക്കത്തിലും മൂടല്‍മഞ്ഞ് തുടരാന്‍ സാധ്യതയുണ്ടെന്നും അദ്ദേഹം വ്യക്തമാക്കി.
