റിഫോം യുകെയും, നിഗല്‍ ഫരാഗും ഉയര്‍ത്തിയ വെല്ലുവിളി അതിജീവിച്ച് കെമി ബേഡനോക്കിന്റെ നേതൃത്വത്തില്‍ കണ്‍സര്‍വേറ്റീവ് പാര്‍ട്ടി തിരിച്ചുവരുന്നു. കണ്‍സര്‍വേറ്റീവ് പാര്‍ട്ടിക്ക് അഭിപ്രായ സര്‍വേയില്‍ വന്‍ മുന്നേറ്റം ലഭിച്ചു. നിഗല്‍ ഫരാഗിന്റെ റിഫോം യുകെയെക്കാള്‍ എട്ട് ശതമാനം പോയിന്റിന്റെ വ്യക്തമായ ലീഡാണ് കണ്‍സര്‍വേറ്റീവുകള്‍ നേടിയിരിക്കുന്നത്. ലോര്‍ഡ് ആഷ്‌ക്രോഫ്റ്റ് നടത്തിയ പുതിയ സര്‍വേയില്‍ ലേബര്‍ പാര്‍ട്ടിക്ക് 31 ശതമാനവും കണ്‍സര്‍വേറ്റീവുകള്‍ക്ക് 26 ശതമാനവും റിഫോം യുകെയ്ക്ക് 18 ശതമാനവുമാണ് പിന്തുണ. ഒരു മാസം മുമ്പ് റിഫോമിനെക്കാള്‍ മൂന്ന് പോയിന്റ് മാത്രമായിരുന്ന കണ്‍സര്‍വേറ്റീവുകളുടെ ലീഡ് എട്ടായി ഉയര്‍ന്നത് പാര്‍ട്ടിക്ക് വലിയ ആത്മവിശ്വാസമാണ് നല്‍കുന്നത്.
പാര്‍ലമെന്റിലെ ആന്‍ഡി ബേണ്‍ഹാമിനെതിരായ ശക്തമായ വിമര്‍ശനങ്ങളും പൊതുവേദികളിലെ കെമി ബേഡനോക്കിന്റെ പ്രകടനങ്ങളും പാര്‍ട്ടിയുടെ മുന്നേറ്റത്തിന് സഹായകമായെന്നാണ് വിലയിരുത്തല്‍. ഒക്ടോബറിലെ പാര്‍ട്ടി സമ്മേളനത്തില്‍ പ്രഖ്യാപിച്ച അനന്തരാവകാശ നികുതി കുറയ്ക്കാനുള്ള നിര്‍ദേശത്തിനും വോട്ടര്‍മാരില്‍നിന്ന് അനുകൂല പ്രതികരണമുണ്ടായി.
അതേസമയം, റിഫോം യുകെയ്ക്ക് സാമ്പത്തിക സഹായം നല്‍കുന്ന ക്രിപ്‌റ്റോകറന്‍സി മേഖലയിലെ പ്രമുഖരെച്ചൊല്ലിയുള്ള വിവാദങ്ങളും ഫരാഗിന് രാഷ്ട്രീയ സമ്മര്‍ദം വര്‍ധിപ്പിക്കുന്നുണ്ട്.
അതിനിടെ, യൂറോപ്യന്‍ യൂണിയനുമായുള്ള ബന്ധം പുനഃസ്ഥാപിക്കാനുള്ള ലേബര്‍ സര്‍ക്കാരിന്റെ നീക്കത്തിനെതിരെ ബേഡനോക്ക് രംഗത്തെത്തി. നവംബര്‍ 20ന് ഒപ്പുവയ്ക്കാനിരിക്കുന്ന കരാര്‍ ബ്രിട്ടീഷ് കുടുംബങ്ങള്‍ക്ക് വലിയ സാമ്പത്തിക ബാധ്യതയുണ്ടാക്കുമെന്നും ഓരോ തൊഴില്‍ ചെയ്യുന്ന കുടുംബത്തിനും 1,220 പൗണ്ട് വീതം ചെലവാകുമെന്നും അവര്‍ ആരോപിച്ചു. പത്തുവര്‍ഷത്തിനിടെ 23 ബില്യണ്‍ പൗണ്ട് യൂറോപ്യന്‍ യൂണിയന്‍ മേഖലകളിലെ സാമ്പത്തിക-സാമൂഹിക അന്തരം കുറയ്ക്കുന്നതിനായി ബ്രിട്ടന്‍ ചെലവഴിക്കേണ്ടിവരുമെന്നാണ് കണ്‍സര്‍വേറ്റീവുകളുടെ വാദം.
