തൃപ്പൂണിത്തുറ സ്വദേശിനിയുടെ ലൈംഗീക പീഡന പരാതിയില്‍ കേസെടുത്തതിനെ തുടര്‍ന്ന് പ്രതിയായ ഡോ ജോണ്‍സണ്‍ കെ വര്‍ഗീസ് വിദേശത്തേക്ക് കടന്നെന്ന സംശയത്തില്‍ പൊലീസ്. ഡോക്ടര്‍ക്കായി ശനിയാഴ്ച തിരച്ചില്‍ നോട്ടീസ് ഇറക്കിയെങ്കിലും കണ്ടെത്താനായില്ല.
നടി അതുല്യ ചന്ദ്രയടക്കം അറസ്റ്റിലായ ബ്ലാക്ക് മെയിലിങ് കേസിലെ പരാതിക്കാരനാണ് ഡോക്ടര്‍. നടിയുടെ ബന്ധുവിന്റെ പരാതിയില്‍ കഴിഞ്ഞ ദിവസമാണ് ഡോക്ടര്‍ക്കെതിരെ കേസെടുത്തത്. 12 യുവതികളുമായുള്ള സ്വകാര്യ ദൃശ്യങ്ങള്‍ ഡോക്ടറുടെ ഫോണില്‍ നിന്ന് പൊലീസ് കണ്ടെത്തിയിരുന്നു.
ബ്ലാക്ക് മെയിലിങ് കേസില്‍ അറസ്റ്റിലായ നടി അതുല്യ ചന്ദ്ര (32), നടന്‍ ബിബിന്‍ പെരുമ്പിള്ളി (42), കെ ബി വിഷ്ണു(31) എന്നിവരെ ഇന്ന് കടവന്ത്ര പൊലീസിന് കസ്റ്റഡിയില്‍ ലഭിച്ചേക്കും. കേസില്‍ കൂടുതല്‍ പ്രതികള്‍ പിടിയിലാകാനുണ്ട്. ഇവര്‍ക്കായി അന്വേഷണം പുരോഗമിക്കുകയാണ്. പീഡനത്തിനിരയായ സ്ത്രീയുടെ മൊഴി കടവന്ത്ര പൊലീസ് രേഖപ്പെടുത്തും.
ഡോക്ടറുടെ കയ്യില്‍ നിന്ന് കവര്‍ന്ന ഫോണ്‍ ഇവരാണ് പൊലീസിന് കൈമാറിയത്. ഇത് എങ്ങനെ സംഭവിച്ചു എന്ന് അന്വേഷിക്കുന്നതിനാണ് മൊഴിയെടുക്കുന്നത്. ഈ ഫോണുള്‍പ്പെടെ ഹാജരാക്കിയാണ് ഇന്‍ഫോ പാര്‍ക്ക് പൊലീസിന് ഇവര്‍ പരാതി നല്‍കിയത്.
