ഇയര്‍ 7 മുതല്‍ 9 വരെയുള്ള കുട്ടികളെ പഠിപ്പിക്കുന്നതില്‍ സുപ്രധാന പൊളിച്ചെഴുത്ത് വരുന്നു. സമയം ആകുന്നതിന് മുന്‍പ് ജിസിഎസ്ഇ പഠിപ്പിക്കരുതെന്ന് സെക്കന്‍ഡറി സ്‌കൂളുകള്‍ക്ക് നിര്‍ദ്ദേശം നല്‍കും. പരീക്ഷകളിലെ ശ്രദ്ധ കുറച്ച് കൂടുതല്‍ അനുഭവങ്ങള്‍ നല്‍കുന്ന രീതിയിലേക്ക് പഠനം മാറ്റണമെന്നാണ് സ്‌കൂളുകള്‍ക്കുള്ള നിര്‍ദ്ദേശം.
കൗമാരത്തിന്റെ തുടക്കകാലത്ത് വിദ്യാര്‍ത്ഥികള്‍ പിന്നോട്ട് വലിയുന്നത് അറ്റന്‍ഡന്‍സിനെയും, നേട്ടങ്ങളെയും ബാധിക്കുന്നതായി രണ്ട് റിവ്യൂകള്‍ കണ്ടെത്തിയതായി എഡ്യൂക്കേഷന്‍ ഡിപ്പാര്‍ട്ട്‌മെന്റ് പറഞ്ഞു. സെക്കന്‍ഡറി സ്‌കൂളുകളിലെ ആദ്യ മൂന്ന് വര്‍ഷങ്ങള്‍ കോര്‍ സബ്ജക്ടുകളില്‍ ശ്രദ്ധിക്കണമെന്ന മുന്‍ കണ്‍സര്‍വേറ്റീവ് ഗവണ്‍മെന്റ് നിലപാടാണ് തിരുത്തുന്നത്. കീ സ്റ്റേജ് 3 വിദ്യാഭ്യാസത്തിലെ ഒരു വ്യത്യസ്ത ഏടാക്കി മാറ്റാനാണ് ഗവണ്‍മെന്റ് പദ്ധതി.
ഇംഗ്ലീഷ്, മാത്സ്, സയന്‍സ് വിഷയങ്ങള്‍ക്ക് മുന്‍ഗണന നല്‍കുകയും, പരീക്ഷ ബുദ്ധിമുട്ടുള്ളതാക്കി മാറ്റുകയുമാണ് മുന്‍ എഡ്യുക്കേഷന്‍ സെക്രട്ടറി മൈക്കിള്‍ ഗോവ് ചെയ്തത്. ഇയര്‍ 11-ന്റെ അവസാനത്തില്‍ ജിസിഎസ്ഇ ഒരുമിച്ച് എഴുതാനും കഴിയുമായിരുന്നു. എന്നാല്‍ ഇതോടെ അധ്യാപകര്‍ വിദ്യാര്‍ത്ഥികളെ പരീക്ഷകള്‍ക്കായി നേരത്തെ ഒരുക്കി തുടങ്ങി.
ഈ അവസ്ഥ ഒഴിവാക്കി കീ സ്റ്റേജ് 3 വിദ്യാര്‍ത്ഥികള്‍ക്ക് പഠനത്തോട് താല്‍പര്യം ജനിപ്പിക്കുന്ന സമയമാക്കി നിലനിര്‍ത്താനാണ് ലേബര്‍ സര്‍ക്കാര്‍ തീരുമാനിച്ചിരിക്കുന്നത്.
