മുതിര്‍ന്ന നേതാവായ പ്രണബ് മുഖര്‍ജി "ഉന്നത തലത്തില്‍ ഒരു മാറ്റത്തിന് സമയമായി" എന്ന് നിര്‍ദ്ദേശിച്ചപ്പോള്‍ സോണിയാ ഗാന്ധി "ഞെട്ടിപ്പോയി" എന്ന വെളിപ്പെടുത്തലില്‍, തന്റെ പിതാവിന്റെ പ്രധാനമന്ത്രിയാകാനുള്ള ആഗ്രഹത്തില്‍ എന്താണ് തെറ്റെന്ന ചോദ്യവുമായി അദ്ദേഹത്തിന്റെ മകള്‍ ശര്‍മ്മിഷ്ഠ മുഖര്‍ജി.
അന്തരിച്ച തന്റെ പിതാവിനെ ന്യായീകരിച്ചുകൊണ്ട്, പ്രധാനമന്ത്രിയാകാനുള്ള അദ്ദേഹത്തിന്റെ ആഗ്രഹത്തിന് "പതിറ്റാണ്ടുകളുടെ അനുഭവസമ്പത്തും" "മികച്ച ബുദ്ധിയും" പിന്തുണയായി ഉണ്ടായിരുന്നുവെന്ന് അവര്‍ പറഞ്ഞു.
സോണിയാ ഗാന്ധി തന്റെ ആത്മകഥയായ 'ബിലോംഗിങ്: എ ജേര്‍ണി ഓഫ് ലവ്' എന്ന പുസ്തകത്തില്‍ 2010-ലെ സംഭാഷണം ഓര്‍ത്തെടുത്തുകൊണ്ട് എഴുതുന്നു: "ഉന്നത തലത്തില്‍ ഒരു മാറ്റത്തിന് സമയമായേക്കാം എന്ന അദ്ദേഹത്തിന്റെ നിര്‍ദ്ദേശം എന്നെ ഞെട്ടിച്ചു. പ്രധാനമന്ത്രിയാകാനുള്ള അദ്ദേഹത്തിന്റെ കാലങ്ങളായുള്ള ആഗ്രഹത്തിന്റെ സൂചനയായാണ് ഞാന്‍ അതിനെ മനസ്സിലാക്കിയത്." "ഇതില്‍ 'ഞെട്ടാന്‍' എന്തിരിക്കുന്നു? പ്രത്യേകിച്ച് രാഷ്ട്രീയത്തിലും ഭരണത്തിലും പതിറ്റാണ്ടുകളുടെ പരിചയസമ്പത്തും കഠിനാധ്വാനവും മികച്ച ബുദ്ധിയും പിന്തുണയായി ഉള്ളപ്പോള്‍, പ്രധാനമന്ത്രിയാകാന്‍ ആഗ്രഹിക്കുന്നത് ഒരു കുറ്റമാണോ?" ശര്‍മ്മിഷ്ഠ മുഖര്‍ജി ചോദിച്ചു.
പ്രധാനമന്ത്രിയാകാനുള്ള ആഗ്രഹത്തെക്കുറിച്ച് പിതാവിനോട് താന്‍ സ്വയം ചോദിച്ച കാര്യം ഓര്‍ത്തെടുത്തുകൊണ്ട്, "ആത്മാഭിമാനമുള്ള ഏതൊരു രാഷ്ട്രീയക്കാരനും ഈ ആഗ്രഹമുണ്ടായിരിക്കും എന്ന് അദ്ദേഹം തുറന്നു പറഞ്ഞു" എന്ന് അവര്‍ വ്യക്തമാക്കി. സാധാരണ പശ്ചാത്തലത്തില്‍ നിന്ന് ഉയര്‍ന്നുവന്ന തന്റെ പിതാവ് "സ്വന്തം യോഗ്യതയും കഠിനാധ്വാനവും" കൊണ്ടാണ് ഇതെല്ലാം നേടിയതെന്ന് അവര്‍ പറഞ്ഞു.
"വംശപാരമ്പര്യത്തിന്റെ അവകാശങ്ങള്‍ കാരണം പ്രധാനമന്ത്രി പദവി ഉള്‍പ്പെടെയുള്ള സ്ഥാനങ്ങളൊന്നും അദ്ദേഹത്തിന് ഒരു തളികയില്‍ വെച്ച് നല്‍കാന്‍ ആരും ഉണ്ടായിരുന്നില്ല. അര്‍ഹതയുള്ള ഒരാള്‍ പ്രധാനമന്ത്രിയാകാന്‍ ആഗ്രഹം പ്രകടിപ്പിച്ചാല്‍ അതില്‍ എന്താണ് തെറ്റ്? ഗാന്ധി-നെഹ്‌റു കുടുംബത്തിന് പുറത്തുള്ള ആരെങ്കിലും അത്തരമൊരു ആഗ്രഹം വെച്ചുപുലര്‍ത്താന്‍ പോലും തുനിഞ്ഞു എന്നതും അത് തങ്ങളോട് 'സൂചിപ്പിക്കാന്‍' ധൈര്യപ്പെട്ടു എന്നതും സോണിയാജിയെ 'ഞെട്ടിച്ചു' എന്ന് വരാന്‍ വഴിയില്ലല്ലോ?" അവര്‍ പറഞ്ഞു.
