ബെല്‍ഫാസ്റ്റിലെ മലയാളി സമൂഹത്തിന് വേദനയായി രാജശ്രീ ജെയ്സ(36)ന്റെ വിയോഗം. കാന്‍സറിനോട് പോരാടിയാണ് രാജശ്രീ മരണത്തിന് കീഴടങ്ങിയത്. ബെല്‍ഫാസ്റ്റിലെ മേരി ക്യൂറി ആശുപത്രിയിലായിരുന്നു അന്ത്യം. രോഗാവസ്ഥയെക്കുറിച്ചും ചികിത്സാ അനുഭവങ്ങളെക്കുറിച്ചും സോഷ്യല്‍ മീഡിയയിലൂടെ നിരന്തരം പങ്കുവെച്ചിരുന്ന രാജശ്രീയുടെ വിയോഗവാര്‍ത്ത സുഹൃത്തുക്കള്‍ക്കും പരിചയക്കാര്‍ക്കും വലിയ ആഘാതമായി.
കാന്‍സറിനെ അതിജീവിച്ചുവെന്ന പ്രതീക്ഷകള്‍ക്കിടെ കഴിഞ്ഞ രണ്ടാഴ്ചയോടെ രോഗം വീണ്ടും മൂര്‍ച്ഛിക്കുകയായിരുന്നു. രണ്ട് പെണ്‍മക്കളെയും ഭര്‍ത്താവ് ജെയ്സനെയും തനിച്ചാക്കിയാണ് രാജശ്രീയുടെ മടക്കം. ചെന്നൈയില്‍ ജനിച്ചുവളര്‍ന്ന രാജശ്രീ മികച്ച രീതിയില്‍ മലയാളം സംസാരിച്ചിരുന്നു. കഴിഞ്ഞ മൂന്ന് വര്‍ഷമായി മാത്രമാണ് കുടുംബം ബെല്‍ഫാസ്റ്റില്‍ താമസമാരംഭിച്ചത്. കുറഞ്ഞ കാലയളവിനുള്ളില്‍ തന്നെ നിരവധി സൗഹൃദങ്ങള്‍ നേടിയെടുക്കാന്‍ രാജശ്രീക്ക് കഴിഞ്ഞിരുന്നു.
കെയറര്‍ വിസയിലാണ് രാജശ്രീയും ജെയ്സനും യുകെയിലെത്തിയത്. ഫാഷന്‍ ഇന്‍ഡസ്ട്രിയുമായി ബന്ധപ്പെട്ട് ജോലി ചെയ്തിരുന്ന രാജശ്രീ പിന്നീട് കെയര്‍ മേഖലയിലും ജോലി ചെയ്തിരുന്നു. യുകെയില്‍ പുതിയ ജീവിതം ആരംഭിച്ച് അധികം വൈകാതെ തന്നെ രോഗബാധിതയാകുകയായിരുന്നു. മൃതദേഹം നാട്ടിലെത്തിച്ച് സംസ്‌കരിക്കാനാണ് കുടുംബത്തിന്റെ ആഗ്രഹം. കുടുംബത്തിന് ആശ്വാസമായി ബെല്‍ഫാസ്റ്റ് മലയാളി സമൂഹം ഒപ്പം തന്നെയുണ്ട്.
