എന്റെ മകളുടെ ഹല്‍ദി ചടങ്ങ് നടക്കേണ്ട ദിവസമായിരുന്നു ഇന്ന്. പകരം, അവളുടെ സംസ്‌കാര ചടങ്ങുകള്‍ക്കുള്ള ഒരുക്കങ്ങളിലാണ് ഞാന്‍. ഞായറാഴ്ചയായിരുന്നു വിവാഹ സല്‍ക്കാരം നിശ്ചയിച്ചിരുന്നത്. വീട് മുഴുവന്‍ വിവാഹ ഒരുക്കങ്ങളായിരുന്നു. ഇപ്പോള്‍ എല്ലാം അവസാനിച്ചു...'' വാഹനാപകടത്തില്‍ തന്റെ ഏക മകള്‍ സിന്ധുശ്രീയെ നഷ്ടപ്പെട്ട പിതാവ് നഞ്ചുണ്ടപ്പയുടെ ഈ വാക്കുകള്‍. വ്യാഴാഴ്ച മോര്‍ച്ചറിക്ക് മുന്നില്‍ വെച്ച്, വിവാഹ ചടങ്ങുകളുടെ ആദ്യ ദിവസം ആഘോഷിക്കേണ്ട തന്റെ മകള്‍ ചേതനയറ്റ് കിടക്കുന്നത് കണ്ട് നിയന്ത്രണം വിട്ട് കരയുകയായിരുന്നു ആ പിതാവ്.
ബുധനാഴ്ച വൈകുന്നേരം ബെംഗളൂരുവിലെ ദീപാഞ്ജലിനഗറിലുണ്ടായ അപകടത്തിലാണ് സോഫ്റ്റ്വെയര്‍ എന്‍ജിനീയറായ സിന്ധുശ്രീയും (29), പിതൃസഹോദരിയുടെ മകളായ വിദ്യയും (19) മരിച്ചത്. ഇരുവരും സഞ്ചരിച്ചിരുന്ന ഇരുചക്രവാഹനത്തില്‍ ലോറിയിടിക്കുകയായിരുന്നു. അവസാന വര്‍ഷ ഡിപ്ലോമ വിദ്യാര്‍ത്ഥിനിയായിരുന്നു മരിച്ച വിദ്യ.
വ്യാഴാഴ്ച 'അരശിന ശാസ്ത്ര' (ഹല്‍ദി), 'ബാലെ ശാസ്ത്ര' എന്നീ ചടങ്ങുകളോടെ സിന്ധുശ്രീയുടെ വിവാഹ ആഘോഷങ്ങള്‍ക്ക് തുടക്കമാകേണ്ടതായിരുന്നു. ഞായറാഴ്ച വിവാഹ സല്‍ക്കാരവും നിശ്ചയിച്ചിരുന്നു. ഇതിനായി കുടുംബം വിപുലമായ ഒരുക്കങ്ങള്‍ നടത്തിയിരുന്നു.
അവസാനമായി ഒരു വിവാഹ ക്ഷണക്കത്ത് കൂടി നല്‍കാനുണ്ടെന്ന് പറഞ്ഞാണ് മകള്‍ വീട്ടില്‍ നിന്നും പുറത്തേക്ക് പോയതെന്ന് നഞ്ചുണ്ടപ്പ കണ്ണീരോടെ പറഞ്ഞു.
'എന്റെ മകള്‍ ഒരു സോഫ്റ്റ്വെയര്‍ പ്രൊഫഷണലായിരുന്നു, ഞാന്‍ ഓട്ടോറിക്ഷ ഓടിച്ചാണ് ജീവിക്കുന്നത്. അവസാനത്തെ ഒരു വിവാഹ ക്ഷണക്കത്ത് കൂടി നല്‍കാനുണ്ടെന്ന് പറഞ്ഞാണ് അവള്‍ പുറത്തേക്ക് പോയത്. തിരികെ വരുമ്പോഴായിരുന്നു ഈ ദുരന്തം. ഇന്ന് അവളുടെ ഹല്‍ദി നടക്കേണ്ടതായിരുന്നു, പക്ഷേ ഞങ്ങള്‍ ഇപ്പോള്‍ അവളുടെ സംസ്‌കാരത്തിനുള്ള ഒരുക്കത്തിലാണ്. ഞായറാഴ്ചയായിരുന്നു റിസപ്ഷന്‍. വിവാഹത്തിന് ആവശ്യമായ എല്ലാം ഞാന്‍ വാങ്ങിവെച്ചിരുന്നു, വീട് മുഴുവന്‍ വിവാഹ സാധനങ്ങള്‍ നിറഞ്ഞിരിക്കുകയാണ്. ഇപ്പോള്‍ എല്ലാം തകര്‍ന്നു,' അദ്ദേഹം വിതുമ്പിക്കൊണ്ട് പറഞ്ഞു.
അപകടത്തില്‍ മരിച്ച വിദ്യ തന്റെ സഹോദരിയുടെ മകളാണെന്ന് അദ്ദേഹം പറഞ്ഞു. തനിക്ക് ഈ ഒരു മകള്‍ മാത്രമേ ഉണ്ടായിരുന്നുള്ളൂവെന്നും, ഈ നഷ്ടം താങ്ങാനാവുന്നതിലും അപ്പുറമാണെന്നും അദ്ദേഹം കൂട്ടിച്ചേര്‍ത്തു.
