കറാച്ചി: ആറുകാലുമായി ജനിച്ചു ലോകത്തെ അമ്പരിപ്പിച്ച പാകിസ്ഥാനി ശിശുവിന്റെ നാല് കാലുകള് ശസ്ത്രക്രിയയിലൂടെ നീക്കി. കറാച്ചിയിലെ നാഷണല് ഇന്സ്റ്റിറ്റിയൂട്ട് ഓഫ് ചെയില്ഡ് ഹെല്ത്തിലെ ഡോക്ടര് ജമാല് റാസയുടെ നേതൃത്വത്തിലാണ് ശസ്ത്രക്രിയ നടത്തിയത്. വ്യാഴാഴ്ച നടന്ന ശസ്ത്രക്രിയയ്ക്ക് ശേഷം കുഞ്ഞിന്റെ ആരോഗ്യനില തൃപ്തികരമാണെന്നും എന്നാല് സര്ജിക്കല് ഇന്റന്സീവ് കെയര് യൂണിറ്റില് പ്രവേശിപ്പിച്ചിരിക്കുകയാണെന്നും ആശുപത്രി അധികൃതര് അറിയിച്ചു. പാകിസ്ഥാനിലെ ഒരു ഗ്രാമീണ ആശുപത്രിയില് കഴിഞ്ഞ വെള്ളിയാഴ്ചയാണ് ആറുകാലുമായി കുട്ടി ജനിച്ചത്.
യഥാര്ത്ഥത്തില് കുഞ്ഞിന് രണ്ട് കാലുകള് മാത്രമേയുള്ളുവെന്ന് ഡോക്ടര്മാര് അറിയിച്ചു. ജനിക്കേണ്ടിയിരുന്ന രണ്ടോ മൂന്നോ കുട്ടികളില് ഒരാള് മാത്രം ഗര്ഭപാത്രത്തില്വച്ച് അതിജീവനം നടത്തിയതാണ് ഈ സമസ്യയ്ക്ക് കാരണമായത്. മറ്റുള്ളവരുടെ ചില അവയവങ്ങള് മാത്രമാണ് വികാസം പ്രാപിച്ചത്. ഇവ കാലുകള് പോലെ വളരുകയും ആയിരുന്നു.
സര്ക്കാര് ചെലവിലാണ് കുഞ്ഞിന് ശസ്ത്രക്രിയ നടത്തിയത്. കുഞ്ഞിനെ രക്ഷിക്കാന് കഴിഞ്ഞതില് നന്ദിയുണ്ടെന്നു പിതാവും എക്സ്റേ ടെക്നീഷ്യനുമായ ഇമ്രാന് ഷെയ്ഖ് പറഞ്ഞു. കുഞ്ഞിനെ നിരീക്ഷിക്കുന്നുണ്ടെന്നും ആവശ്യമെങ്കിലും തുടര്ന്നും സഹായം ഏര്പ്പെടുത്തുമെന്നും സിന്ധ് പ്രവിശ്യയിലെ ആരോഗ്യ വിഭാഗം ഉദ്യോഗസ്ഥര് അറിയിച്ചു.
