ഇസ്ലാമാബാദ്: ശുചിമുറിയാണെന്നു തെറ്റിദ്ധരിച്ചു യുവതി യുവതി തുറന്നത് പാക് വിമാനത്തിന്റെ എക്സിറ്റ് വാതില് സംഭവം യാത്രക്കാരില് പരിഭ്രാന്തി പരത്തി. ഉടനെ വിമാന ജീവനക്കാര് യാത്രക്കാരെ പുറത്തിറക്കി. യുകെയിലെ മാഞ്ചസ്റ്റര് വിമാനത്താവളത്തില് പാക്കിസ്ഥാന് ഇന്റര്നാഷനല് എയര്ലൈന്സ് (പിഐഎ) വിമാനത്തിലാണു സംഭവം.വിമാനം നീങ്ങിത്തുടങ്ങാത്തതിനാല് അപകടമൊഴിവായെന്ന് എയര്ലൈന് വക്താവ് അറിയിച്ചു.
നാല്പതോളം യാത്രക്കാരുമായി റണ്വേയില് കിടക്കുകയായിരുന്നു പികെ 702 വിമാനം. ഇതിലെ യാത്രക്കാരി അബദ്ധത്തില് വിമാനത്തിന്റെ എക്സിറ്റ് വാതില് തുറന്നു. ഇതോടെ വിമാനത്തിലെ എമര്ജന്സി സംവിധാനങ്ങള് പ്രവര്ത്തനക്ഷമമായി. പരിഭ്രാന്തരായ ജീവനക്കാര് യാത്രക്കാരെ അടിയന്തരമായി പുറത്തിറക്കി.
മാഞ്ചസ്റ്ററില്നിന്ന് ഇസ്ലാമാബാദിലേക്കു സര്വീസ് നടത്തുന്ന വിമാനം ഇതേത്തുടര്ന്ന് 7 മണിക്കൂര് വൈകിയാണു പറന്നത്. സുരക്ഷാപ്രശ്നങ്ങള് പരിശോധിച്ചു വിലയിരുത്താനാണ് ഇത്രയും സമയമെടുത്തത്. യാത്രക്കാര്ക്കു മറ്റു വിമാനങ്ങളില് സൗകര്യമൊരുക്കി കൊടുത്തതായി പിഐഎ വക്താവ് അറിയിച്ചു.
